Nayanthara
Nayanthara : నటనతో పాటు దర్శకత్వం వైపు చాలా మంది అగ్ర నటీమణులు వెళ్లారు. దాదాపు అందరూ సక్సెస్ అయ్యారు. అందులో ప్రముఖంగా వినిపించే పేర్లు విజయనిర్మల, జీవిత రాజశేఖర్. వీరు హీరోయిన్లుగా సక్సెస్ కావడంతో పాటు డైరెక్టర్లుగా సక్సెస్ అయ్యారు. వారు తీసిన సినిమాలు చాలా వరకు బాక్సాఫీస్ హిట్లు అయ్యాయి. అయితే వీరి బాటలోనే మరో అగ్రతార పయనించేందుకు సిద్ధంగా ఉంది. ఆమెనే నయనతార.
దాదాపు రెండు దశాబ్దాల సినీ కెరీర్ లో వైవిధ్యభరితమైన పాత్రలను అప్రయత్నంగా పోషించిన నయనతార విమర్శకులను మెప్పించడంలో దిట్ట. వైవిధ్యమైన పాత్రలను ఆకళింపు చేసుకుంటూ ప్రేక్షకులను అలరిస్తూనే ఉంది. ఈ ఏడాది బాలీవుడ్ డెబ్యూ మూవీ ‘జవాన్’లో కూడా నయనతార తనదైన శైలిలో మెప్పించింది. ఈ సినిమాలో ఆమె నటించిన తీరు విమర్శకుల నుంచి ప్రశంసలు అందుకుంది.
తాజా పరిణామాల్లో నయనతార పూర్తిగా కొత్త రంగంలోకి అడుగు పెట్టబోతున్నట్లు తెలుస్తోంది. కానీ ఈసారి మాత్రం తెరవెనుక. ‘న్యూ బిగినింగ్స్ మ్యాజిక్ నమ్మండి’ అనే క్యాప్షన్ తో ఫిల్మ్ కెమెరా వెనుక ఉన్న తన ఫొటోను తన సోషల్ మీడియాలో షేర్ చేసింది. చిత్రబృందం మధ్య నయనతార ఉన్న ఈ ఫోటో ఆమె దర్శకత్వ అరంగేట్రం కోసం సిద్ధమవుతోందనే ఊహాగానాలకు అభిమానుల్లో ఆసక్తిని రేకెత్తించింది. ప్రస్తుతానికి దీనిపై అఫీషియల్ కన్ఫర్మేషన్ లేదు కానీ అభిమానులు మాత్రం ఇదే ఊహాగానాలు చేస్తున్నారు. ఆమెకు చిత్ర నిర్మాణం, నటనలో ఉన్న గ్రిప్ కారణంగా ఆ దిశగా కూడా వెళ్తుందని అనేవారు లేకపోలేదు.