Nizamabad Mayor Husband : నిజామాబాద్ నగర మేయర్ నీతూకిరణ్ భర్త, బీఆర్ఎస్ నాయకుడు దండు చంద్రశేఖర్ పై సోమవారం దాడి జరిగింది. జిల్లా కేంద్రంలోని నాగారంలో కార్పొరేటర్ కార్యాలయం వద్ద చంద్రశేఖర్, ఆయన అనుచరులు నిల్చొని ఉండగా, ఆటో డ్రైవర్ షేక్ రసూల్ అక్కడికి చేరుకొని దూషిస్తూ మొదట చేతి ముఖంపై దాడి చేశారు. దీంతో చంద్రశేఖర్ కిందపడిపోయారు. ఆయన అనుచరుల్ని బెదిరించడంతో వారు మిన్నకుండి పోయారు. అనంతరం ఆటోలో ఉన్న సుత్తెతో చంద్రశేఖర్ ముఖంపై రసూల్ బాదడంతో దవడ పైభాగంలో తీవ్ర గాయాలయ్యాయి. క్షతగాత్రుడిని ఓ ప్రైవేటు ఆస్పత్రికి తరలించగా చికిత్స పొందుతున్నారు.
నిజామాబాద్ ఏసీపీ రాజావెంకట్ రెడ్డి ఆస్పత్రికి వెళ్లి చంద్రశేఖర్ తో మాట్లాడి వివరాలు తెలుసుకున్నారు. ప్రస్తుతం చంద్రశేఖర్ ఆరోగ్యం నిలకడగా ఉదని, ఎలాంటి ప్రాణాపాయం లేదని మీడియాకు ఏసీపీ తెలిపారు. నిందితుడిని త్వరగా పట్టుకుంటామని చెప్పారు. మేయర్ నీతూకిరణ్ ఫిర్యాదు మేరకు కేసు నమోదు చేసి దర్యాప్తు చేపట్టారు.
