Tripti Dimri:ట్రెండీ ల‌వ్ స్టోరిలో త్రిప్తీ దిమ్రీ అవ‌కాశం ద‌క్కించుకుంది. అది కూడా కార్తీక్ ఆర్య‌న్ లాంటి క్రేజీ హీరో స‌ర‌స‌న ఒక అంద‌మైన ప్రేమ‌క‌థా చిత్రంలో ఈ బ్యూటీ అవ‌కాశం అందుకోవ‌డం ఇప్పుడు ఫిలింన‌గ‌ర్ లో హాట్ టాపిక్. త్రిప్తీ రియ‌ల్లీ ల‌క్కీ గ‌ర్ల్ అంటూ అభిమానులు మురిసిపోతున్నారు. వివ‌రాల్లోకి వెళితే..ఒకే ఒక్క సినిమాతో హాట్ గాళ్ త్రిప్తీ దిమ్రీ ఫేట్ మారిపోయింది. బ్లాక్ బ‌స్ట‌ర్ యానిమ‌ల్ లో ర‌ణ్‌బీర్ స‌ర‌స‌న త్రిప్తీ న‌ట‌న‌కు యువ‌త‌రం ఫిదా అయిపోయారు.
కేవ‌లం యూత్ మాత్ర‌మే కాదు ఇండ‌స్ట్రీ వ‌ర్గాలు కూడా త్రిప్తీ అంద‌చందాలు, న‌ట ప్ర‌తిభ‌కు ఫిదా అయిపోయాయి. త్రిప్తీకి ప‌లు భాష‌ల్లో వ‌రుస అవ‌కాశాలొస్తున్నాయ‌న్న స‌మాచారం ఉంది. టాలీవుడ్ లోను త్రిప్తీ గ్రాండ్ గా ఎంట్రీ ఇవ్వ‌నుంది. అది కూడా సలార్ స్టార్ ప్ర‌భాస్ స‌ర‌స‌న సందీప్ వంగా తెర‌కెక్కించే స్పిరిట్ చిత్రంలో ఒక క‌థానాయిక‌గా న‌టించ‌నుంద‌ని తెలిసింది. ఇంత‌లోనే బ్లాక్ బ‌స్ట‌ర్ ఆషిఖి ఫ్రాంఛైజీలో త్రిప్తీ ప్ర‌వేశించ‌నుంద‌ని క‌థ‌నాలొస్తున్నాయి. త్రిప్తి ఇప్ప‌టికే ఈ ప్రాజెక్టుకి సంత‌కం చేసింది. కార్తీక్ ఆర్య‌న్ స‌ర‌స‌న న‌టించ‌నుంది.
కొత్త సంవ‌త్స‌రంలో రానున్న మోస్ట్ అవైటెడ్ చిత్రాల్లో ఆషిఖి 3 కూడా ఒక‌టి కావ‌డంతో ఇప్పుడు స‌ర్వ‌త్రా ఆస‌క్తి నెల‌కొంది. ఆషిఖి చిత్రాల పూర్వాప‌రాల్లోకి వెళితే ఆషిఖి తొలి చిత్రం 1990లో విడుద‌లైంది. అప్ప‌ట్లో ప్రేమ‌క‌థా చిత్రంగా రిలీజై సంచ‌ల‌న విజ‌యం సాధించింది. ఈ సినిమాలో న‌టించిన కొత్త‌మ్మాయ్ కి ఓవ‌ర్ నైట్ లో ఫేట్ మారిపోయింది. ఈ సినిమాతో కొత్త న‌టి అను అగర్వాల్ పేరు మార్మోగింది. ఈ సినిమా ఊహించని మ్యూజికల్ హిట్‌గా నిలిచింది. ఇదే ఫ్రాంఛైజీలో ఆషిఖి 2 కొన్నేళ్ల గ్యాప్ త‌ర్వాత 2013లో వచ్చింది.
ఈ చిత్రంలో ఆదిత్య రాయ్ కపూర్, శ్రద్ధా కపూర్ జంట‌గా న‌టించ‌గా, ఈ జోడీ ఫేట్ మారిపోయింది. ముఖ్యంగా శ్రద్ధా కపూర్ కి ఆ త‌ర్వాత కెరీర్ ప‌రంగా వెనుదిరిగి చూసుకునే పని లేకుండా పోయింది. మోహిత్ సూరి దర్శకత్వం వహించిన ఇది మ్యూజికల్ హిట్‌గా నిలిచింది. ఇప్పుడు ఇలాంటి గ్రేట్ ఫ్రాంఛైజీలో అడుగుపెడుతోంది త్రిప్తీ దిమ్రీ. కెరీర్ కి ఒక్క ల‌వ్ స్టోరి అది కూడా మ్యూజికల్ హిట్ పడితే ఇక ఈ భామ క్రేజ్ స్కైని తాక‌డం గ్యారెంటీ అని భావిస్తున్నారు. ఆషిఖి 3తో త్రిప్తీ ఫేట్ అమాంతం మారిపోవ‌డం ఖాయ‌మ‌ని అంచ‌నాలు వెలువ‌రిస్తున్నారు.