#Yatra2:వైఎస్ జ‌గ‌న్ కోసం `యాత్ర 2`ని కూడా అప్పుడే రిలీజ్ చేస్తున్నారు!
#Yatra2:ఉమ్మ‌డి ఆంధ్ర‌ప్ర‌దేశ్ ముఖ్య‌మంత్రి, దివంగ‌త నేత వైఎస్ రాజ‌శేఖ‌ర్ రెడ్డి పాద‌యాత్ర నేప‌థ్యంలో మ‌హి.వి. రాఘ‌వ్ రూపొందించిన పొలిటిక‌ల్ డ్రామా `యాత్ర`. మ‌ల‌యాళ మెగాస్టార్ మ‌మ్ముట్టి వైఎస్ పాత్ర‌లో న‌టించిన ఈ సినిమా 2019లో విడుద‌లై ఆనాటి ఎన్నిక‌ల్లో వైఎస్ జ‌గ‌న్‌కు ప్ల‌స్‌గా మారింది. రాష్ట్ర ప్ర‌జ‌ల‌ని త‌న‌వైపు తిప్పడంతో ప్ర‌ధాన పాత్ర పోషించి వైఎస్ జ‌గ‌న్ ఎన్నిక‌ల్లో విజ‌యం సాధించేలా చేసింది. మ‌ళ్లీ ఇన్నాళ్ల‌కు వైఎస్ జ‌గ‌న్ బ‌యోపిక్ ఆధారంగా `యాత్ర 2` రూపొందుతున్న విష‌యం తెలిసిందే.
ఇప్ప‌టికే వివాదాస్ప‌ద ద‌ర్శ‌కుడు రామ్ గోపాల్ వ‌ర్మ `వ్యూహం` సినిమాని రూపొందిస్తున్నారు. దీనికితోడు `యాత్ర 2` కూడా ప్రేక్ష‌కుల ముందుకు రాబోతోంది. మ‌మ్ముట్టి వైఎస్ రాజ‌శేఖ‌ర‌రెడ్డి పాత్ర‌లో న‌టిస్తుండ‌గా, త‌మిళ హీరో జీవా వైఎస్ జ‌గ‌న్ పాత్ర‌ని పోషిస్తున్నారు. త్రీ ఆట‌మ్ లీవ్స్ , వీ సెల్యూలాయిడ్‌, శివ మేక సంయుక్తంగా ఈ సినిమాని నిర్మిస్తున్నారు. ప్ర‌స్తుతం ఈ మూవీ షూటింగ్ శ‌ర‌వేగంగా జ‌రుగుతోంది.
గురువారం ఏపీ ముఖ్య‌మంత్రి వైఎస్ జ‌గ‌న్ పుట్టిన రోజు సంద‌ర్భంగా చిత్ర బృందం `యాత్ర 2` కొత్త పోస్ట‌ర్‌ని విడుద‌ల చేసింది. పోస్ట‌ర్‌లో ఓ ప‌క్క అచ్చం వైఎస్ జ‌గ‌న్‌ను పోలిన జీవా క‌నిపిస్తుండ‌గా..మ‌రో ప‌క్క వైఎస్ పాత్ర‌లో మ‌మ్ముట్టి క‌నిపిస్తున్నారు. ఈ పోస్ట‌ర్ ప్రేక్ష‌కుల్ని వైసీపీ అభిమానుల్ని విశేషంగా ఆక‌ట్టుకుంటోంది. వైఎస్ జ‌గ‌న్ ప్ర‌జా నాయ‌కుడిగా ఎదిగిన ఈరు, 2009 నుంచి 2019 వ‌ర‌కు ఆంధ్ర‌ప్ర‌దేశ్‌లో జ‌రిగిన నాట‌కీయ ప‌రిణామాల నేప‌థ్యంలో `యాత్ర 2`ను రూపొందిస్తున్నారు. `యాత్ర` చిత్రాన్ని ఫిబ్ర‌వ‌రి 8, 2019లో విడుద‌ల చేశారు. అదే సెంటిమెంట్‌లో `యాత్ర 2`ని కూడా 2023, ఫిబ్ర‌వ‌రి 8న రిలీజ్ చేయ‌బోతున్నారు.
వ‌చ్చే ఎన్నిక‌ల‌ని టార్గెట్‌గా పెట్టుకుని వైఎస్ జ‌గ‌న్‌కు అనుకూల వాతావ‌ర‌ణాన్ని క్రియేట్ చేయాల‌నే ఆలోచ‌న‌లో భాగంగానే ఈ సినిమాని మేక‌ర్స్ రూపొందించారు. వైఎస్ జ‌గ‌న్ కూడా ఈ సినిమాతో మ‌రోసారి ఏపీ ఎన్నిక‌ల్లో ప్ర‌భావం చూపించాల‌ని, సింప‌తీ ఓట్ల‌ని ద‌క్కించుకోవాలనే ఆలోచ‌న‌లో ఉన్నారు. గ‌త ఎన్నిక‌ల స‌మ‌యంలో జ‌రిగిన‌ట్టుగానే ఫ‌లితాలు వ‌చ్చే ఎన్నిక‌ల్లోనూ పున‌రావృతం అవుతాయా? లేక వైఎస్ జ‌గ‌న్‌కు షాక్ ఇస్తాయా? అన్న‌ది తెలియాలంటే వ‌చ్చే ఎన్నిక‌ల వ‌ర‌కు వేచి చూడాల్సిందే.
