Hero Nikhil : టీడీపీలో చేరిన యంగ్ హీరో నిఖిల్.. మామకు మద్దతుగా..

Hero Nikhil

Hero Nikhil : ఏపీలో ఎన్నికల ముందు రాజకీయ పార్టీల్లో చేరికలు, వలసలు కొనసాగుతున్నాయి. తాజాగా టాలీవుడ్ యంగ్ హీరో నిఖిల్ సిద్ధార్థ్ టీడీపీలో చేరారు. టీడీపీ అగ్రనేత నారా లోకేశ్ ఆయనకు కండువా కప్పి పార్టీలోకి ఆహ్వానించారు. త్వరలో రాష్ట్రంలో అసెంబ్లీ, లోక్ సభ ఎన్నికలు జరుగనున్న నేపథ్యంలో నిఖిల్ టీడీపీలో చేరడం ప్రాధాన్యం సంతరించుకుంది.

నిఖిల్ తెలుగు ప్రేక్షకులనే కాదు కార్తికేయ-2 మూవీతో దేశవ్యాప్తంగా మంచి పేరు సంపాదించుకున్నాడు. టాలీవుడ్ మిడ్ రేంజ్ హీరోల్లో నిఖిల్ కు మంచి మార్కెట్ ఉంది. ఈక్రమంలో ఆయన రాజకీయాల్లో చేరడం చర్చనీయాంశమైంది. టీడీపీ తరుపున నిఖిల్ ఎన్నికల ప్రచారంలో పాల్గొంటారని తెలుస్తోంది. కాగా, బాపట్ల జిల్లా చీరాల టీడీపీ ఎమ్మెల్యే అభ్యర్థి కొండయ్య యాదవ్ కు నిఖిల్ దగ్గరి బంధువు. కొండయ్య యాదవ్ కు నిఖిల్ అల్లుడి వరుస అవుతారు. పార్టీలో చేరిన సందర్భంగా నిఖిల్ ట్విటర్ వేదికగా స్పందించారు.

‘చీరాల నుంచి టీడీపీ ఎమ్మెల్యే టికెట్ పొందినందుకు మావయ్య ఎమ్ఎమ్ కొండయ్య యాదవ్ కు అభినందనలు. అలాగే ధన్యవాదాలు. మా కుటుంబానికి ప్రజలకు సేవ చేసే అవకాశం వచ్చిందని, మీ అందరి ఆశీస్సులు మామయ్యకు కావాలి’ అని నిఖిల్ కోరారు. దీంతో నారా లోకేశ్ తో నిఖిల్ దిగిన ఫొటోలు సోషల్ మీడియాలో వైరల్ అవుతున్నాయి.

నిఖిల్ టీడీపీలో చేరడంతో టీడీపీ అభిమానులు, శ్రేణులు, కార్యకర్తల్లో ఉత్సాహం నెలకొంది. చీరాల టీడీపీ ఎమ్మెల్యే కొండయ్య యాదవ్ కు అండగా ఎన్నికల ప్రచారం చేసే అవకాశాలు ఉన్నాయని రాజకీయ వర్గాలు చెబుతున్నాయి. అలా జరిగితే పార్టీకి ప్లస్ అవుతుందని భావిస్తుందన్నారు. ఆయన ఎన్నికల ప్రచారంలో పాల్గొంటారా లేదా అనేది త్వరలోనే తెలియనుంది.

అయితే నిఖిల్ టీం మాత్రం ఆయన టీడీపీలో చేరలేదని, ఆ పార్టీ అభ్యర్థికి మద్దతుగా ఉంటానని చెప్పేందుకే పసుపు కండువా కప్పుకున్నారని చెప్పడం గమనార్హం. మరో వైపు సినిమాలతో బిజీగా ఉన్నారు. ప్రస్తుతం ‘స్వయంభు’ చిత్రంలో నటిస్తున్నారు. భరత్ కృష్ణమాచారి దర్శకత్వం వహించనున్న ఈ చిత్రంలో హీరోయిన్ గా సంయుక్త నటిస్తోంది. మరోవైపు దర్శకుడు చందు మొండేటి కార్తికేయ-3 ని కూడ ప్రకటించారు.