Kumari Aunty : కష్టజీవులను ప్రచారంలో వాడుకోవడం ఎందుకు? కుమారీ ఆంటీ ఎపిసోడ్..పార్టీల మధ్య ట్వీట్ వార్..

Kumari Aunty : తెలంగాణ ఎన్నికల్లో ఇన్ స్టా ఇన్ ఫ్లూయన్సర్లతో కేటీఆర్ చేయించిన విన్యాసాలు గుర్తుండే ఉంటుంది. ‘‘గులాబీ జెండలే రామక్క’’ అంటూ ఆయన అమెరికా నుంచి ఆదిలాబాద్ దాక ఎంతో మంది ఇన్ ఫ్లూయన్సర్లు ఉంటే అంతమందితో బీఆర్ఎస్ సపోర్టివ్ వీడియోలు చేయించారు. చివరకు అది పెద్ద ప్లాప్ గా మిగిలింది. అయినా ఏపీలోని వైసీపీ పాఠాలు నేర్చుకోలేదు. రెండు రోజులుగా ఇన్ ఫ్లూయర్స్ వీడియోలు చేస్తుంటే వైసీపీ సోషల్ మీడియాలో హైలెట్ చేస్తోంది.

అయితే వీటిపై జనాల నుంచి నెగెటివిటీ రావడంతో భయపడిపోయి చాలా మంది వివరణ కూడా ఇచ్చారు. తాము జగన్ రెడ్డికి సపోర్ట్ చేయడం లేదని..ప్రమోషన్ లో భాగంగానే ఆ వీడియోలను చేశామని చెప్పుకొస్తున్నారు. కానీ జగన్ రెడ్డిపై ఉన్న వ్యతిరేకత వారిపై బలంగా కనిపిస్తోంది. వైసీపీ సోషల్ మీడియా ఎంత కక్కుర్తిలో ఉందంటే.. ఎవరు యూట్యూబ్ లో ట్రెండింగ్ లో ఉంటే వారికి ఎంతో కొంత ఇచ్చి జగన్ రెడ్డి మాకు ఫలానాది చేశాడని చెప్పిస్తున్నారు.

తాజాగా స్ట్రీట్ ఫుడ్ అమ్మే కుమారీ ఆంటీ వీడియో సోషల్ మీడియాలో వైరల్ అయింది. ఆమె రోజుకు రెండు లక్షల రూపాయలు సంపాదిస్తుందని చెప్పుకుంటూ ఉంటారు. వైరల్ కావడంతో ఆమె బండి వద్దకు చాలా మంది జనాలు వెళ్తున్నారు. బండి ముందు పెద్ద క్యూ ఉంటోంది. ఆమెకు జగన్ రెడ్డి ఇల్లు ఇచ్చారని చెప్పించారు. దాన్ని అఫిషీయల్ అకౌంట్ లో సైతం పోస్ట్ చేశారు.

ఏపీలో సెంటు స్థలం ఇచ్చినా అక్కడ బతకడానికి లేకుండా చేశారని సెటైర్స్ కూడా ఈ వీడియోలో పడుతున్నాయి. సెంటు స్థలం, ఇళ్లు ఎవరికీ ఇవ్వలేదు. స్థలం మాత్రం ఇచ్చారు. ఆ సెంటు స్థలంలో ఇల్లు కట్టలేరు కూడా. అయినా సామాన్యులే తమ బ్రాండ్ అంబాసీడర్లంటూ..ఇలా అందరికీ డబ్బులిచ్చి ప్రమోషన్ చేసేసుకుంటున్నారు. నిజంగా ఆమెకు ఇల్లు ఇచ్చి ఉంటే..ఆ ఇంటి దగ్గరకు పోయి నానా హడావిడి చేసేవారు కదా. కానీ నయానో, భయానో చెప్పించి ఇలా రచ్చ చేస్తున్నారనే టాక్ వినిపిస్తోంది.

ఈనేపథ్యంలో సోషల్ మీడియాలో పాపులర్ అయిన కుమారీ ఆంటీ హోటల్ ను పోలీసులు మూసివేశారు. దీంతో వైసీపీ, జనసేన మధ్య ట్వీట్ వార్ మొదలైంది. తనకు ఆస్తులు లేవని, కేవలం జగనన్న ఇల్లు ఒక్కటే ఉందని ఇటీవల ఓ ఇంటర్వ్యూలో ఆమె చెప్పారు. ఆ వీడియోను వైసీపీ శ్రేణులు ట్రెండ్ చేశాయి. దీంతో కుట్రపూరితంగా రేవంత్ రెడ్డితో చెప్పి టీడీపీ కుమారీ ఆంటీ హోటల్ మూసివేయించిందని వైసీపీ ఆరోపిస్తోంది. దీనికి సమస్యలో ఉన్న మహిళను ఆదుకోవడం మానుకుని ఆరోపణలు చేయడానికి సిగ్గులేదా? అని జనసేన ప్రశ్నించింది.

ఏదో కష్టపడి పనిచేసుకుని పొట్టపోసుకునే ఇలాంటి సామాన్యులతో పార్టీలు ఇలా రాజకీయం చేయడం ఏంటని జనాలు విస్తుపోతున్నారు. పనిచేసుకుని బతికే వారిని రాజకీయాల్లోకి ఎందుకు లాగుతున్నారని ప్రశ్నిస్తున్నారు. ఇలాంటి వారికి ఎంతో కొంత ముట్టజెప్పి ప్రచారం చేయించుకోవాల్సిన అవసరం ఏమొచ్చిందని అంటున్నారు. దీంతో సామాన్యులకు ఇబ్బందులే తప్ప ఏ ప్రయోజనం ఉండదని చెబుతున్నారు.