- మృతుల్లో నవదంపతులు
Road Accident
Road Accident : ఏపీలోని నంద్యాల జిల్లాలో ఘోర రోడ్డు ప్రమాదం జరిగింది. ఆళ్లగడ్డ మండలం నల్లగట్ల వద్ద హైవేపై లారీని కారు ఢీకొట్టింది. ఈ ప్రమాదంలో ఒకే కుటుంబానికి చెందిన ఐదుగురు దుర్మరణం చెందారు. వీరిలో నవ దంపతులు ఉండడం బాధాకరం. మృతులను హైదరాబాద్ వాసులుగా గుర్తించారు.
సికింద్రాబాద్ లోని వెస్ట్ వెంకటాపురం ప్రాంతానికి చెందిన మంత్రి రవీందర్ తన కుటుంబంతో కలిసి కారులో తిరుమల శ్రీవారి దర్శనానికి వెళ్లారు. అనంతరం తిరిగి వస్తుండగా నల్లగట్ల హైవేపై నెమ్మదిగా వెళ్తున్న లారీని వెనకనుంచి కారు ఢీకొట్టింది. ఈ ఘటనలో రవీందర్ తో పాటు అతడి భార్య లక్ష్మి, కుమారుడు బాలకిరణ్, కోడలు కావ్య, మరో కుమారుడు ఉదయ్ కిరణ్ తీవ్రంగా గాయపడి అక్కడికక్కడే మృతిచెందారు.
గత నెల 29న బాలకిరణ్ కు కావ్యతో గుంటూరు జిల్లా తెనాలిలో వివాహం జరిపించారు. ఈ నెల 3న శామీర్ పేటలో ఘనంగా రిసెప్షన్ నిర్వహించారు. 4న నూతన దంపతులను తీసుకుని వెంకన్న దర్శనం కోసం తిరుమలకు వెళ్లారు. తిరిగి వస్తుండగా ఈ ఘోరం జరిగింది.
ఇటీవల కాలంలో మితిమీరిన వేగం, నిద్రమత్తు, నిర్లక్ష్యం వంటి కారణాల వల్ల రోడ్డు ప్రమాదాలు ఎక్కువగా జరుగుతున్నాయని పోలీసులు చెబుతున్నారు. ఈ ప్రమాదంలో కూడా మితిమీరిన వేగం కారణంగానే ఐదుగురి ప్రాణాలు గాలిలో కలిసిపోయాయని అంటున్నారు.