Villain
Villain : సినిమాలో విలన్ క్యారెక్టర్ ఎస్టాబ్లిష్ కాకపోతే తెరమీద హీరో ఎన్ని అద్భుతాలు చేసినా ప్రేక్షకులకు ఎక్కదు. విలన్ ఎంత బలంగా ఉంటే.. హీరోయిజం అంత ఎలివేట్ అవుతుంది. అదే సమయంలో హీరో కూడా విలన్ తో ఢీ అంటే డీ అన్నట్లుగానే తన క్యారెక్టర్ పండించగలగాలి. అప్పుడే ప్రేక్షకుడు ఉత్కంఠగా సినిమా చూస్తాడు. లేదంటే సినిమాలు ఎన్ని మసాలాలు దట్టించినా, జిమ్మిక్కులు చేసినా పట్టించుకోడు.
కొన్నేళ్లుగా హీరోలుగా రాణించి, ఆ సక్సెస్ లు లేక చతికిల పడిపోయిన వాళ్లెందరో ఉన్నారు. అలాంటి వారిలో కొందరు తెరమరుగు కాగా, మరికొందరు సపోర్టింగ్ రోల్స్, గెస్ట్ రోల్స్ చేస్తు్న్నారు. కానీ ఇప్పుడు సినిమాకు భాష అనే హద్దులు చెరిగిపోయాయి. దీంతో ఒకప్పటి స్టార్ హీరోలు విలన్ అవతారమెత్తుతున్నారు. తెలుగులో అలా సక్సెస్ అయిన వారిలో జగపతి బాబు. ఒకప్పుడు ఫ్యామిలీ హీరోగా, మాస్ హీరోగా రాణించిన జగ్గూభాయ్ ఇప్పుడు స్టైలిష్, క్రూరమైన విలన్ గా సత్తా చాటుతున్నాడు. దక్షిణాదిలోని అన్ని భాషల్లోనూ విలన్ గా చేసి తానేంటో నిరూపించుకున్నాడు.
ఇప్పుడు అదే కోవంలో ఓ బాలీవుడ్ హీరో బాబీ డియోల్ సైతం విలన్ అవతారమెత్తాడు. ఓ స్టార్ హీరో కొడుకుగా మంచి బ్యాక్ గ్రౌండ్ తో సినిమాల్లో హీరోగా ఎంట్రీ ఇచ్చాడు. మొదట్లో విజయాలు అందుకున్నా ఆ తర్వాత ఫ్లాఫులు వీడలేదు. ఇక లాభం లేదనుకొని కొన్నాళ్ల పాటు సినిమాలకు దూరంగా ఉన్నాడు. ఆ తర్వాత నెగెటివ్ రోల్స్ చేయాలని ఫిక్సయ్యాడు. హిందీ వెబ్ సిరీస్ ఆశ్రమ్ లో నెగెటివ్ రోల్ తో ఆకట్టుకున్నాడు. ఇక తెలుగు దర్శకుడు సందీప్ వంగా రూపొందించి యానిమల్ లో విలన్ గా తానేంటో నిరూపించుకున్నాడు. ఈ ఒక్క సినిమా బాబీకి దేశ వ్యాప్తంగా సరికొత్త గుర్తింపు తెచ్చింది. ఇక అటు బాలీవుడ్ తో పాటు సౌత్ ఇండస్ర్టీ కూడా బాబీని తమ సినిమాల్లో విలన్ గా చేయమంటూ వెంట పడుతున్నారు. సౌత్ లో రాబోయే పెద్ద సినిమాల్లో బాబీ విలన్ గా కనిపించబోతున్నాడు.
బాలీవుడ్ లో మొన్నటి దాకా గెస్ట్ రోల్ కోసం కూడా ఎవరూ అడగలేదు. కానీ ప్రస్తుతం బాబీ డియోల్ ను అవకాశాలు ముంచెత్తుతున్నాయి. విజయ్ సినిమాలో బాబీ చేయబోతున్నారని టాక్ వినిపిస్తున్నది. యానిమల్ లో విలన్ రోల్ కు మంచి రెస్పాన్స్ రావడంతో ప్రస్తుతం సౌత్‌లో ఏ స్టార్ హీరో సినిమా చేసినా విలన్‌గా బాబీ పేరే ముందుంటున్నది.
తమిళ స్టార్ సూర్య నటిస్తున్న కంగువలోనూ బాబీ విలన్‌గా నటిస్తున్నారు. సూపర్‌స్టార్‌ రజినీకాంత్ మీదున్న గౌరవంతో కంగువ సినిమా రిలీజ్ పోస్ట్ పోన్‌ అయ్యింది. ముందుగా ప్రకటించిన డేట్ ప్రకారం రిలీజ్ అయ్యేదుంటే అక్టోబర్‌ 10న థియేటర్లలో బాబీ విశ్వరూపం చూసేవారు.
హరిహరవీరమల్లు అనుకున్న టైమ్ లో రిలీజ్ అయ్యేదుంటే బాబీ ఇప్పటికే మరో సౌత్ మూవీ వస్తుండేది కావచ్చు. పవర్ స్టార్ పవన్‌ కల్యాణ్‌ చేస్తున్న హరిహరవీరమల్లులోనూ బాబీ డియోలే విలన్. ఇక నందమూరి నటసింహం బాలకృష్ణ 109 మూవీలోనూ బాబీ డియోలే విలన్. ఆ తర్వాత దళపతి విజయ్ 69వ సినిమాలోనూ విలన్‌గా బాబీ పేరే వినిపిస్తోంది. ఇక 2025 అంతా బాబీ కనిపంచబోతున్నాడని టాక్.