Singer Mangli
Singer Mangli : మంగ్లీ తన పాటలతో రెండు తెలుగు రాష్ట్రాలను ఉర్రూతలూగిస్తోంది. అటు సినిమాల్లోనూ, ఇటు ప్రైవేట్ ఆల్బమ్స్ ల్లోనూ తన హవా సాగిస్తోంది. తనదైన గాత్రంతో మంగ్లీ అందరినీ అలరిస్తోంది. హుషారైన పాటలే కాదు ఆధ్యాత్మిక గీతాల్లోనూ మంగ్లీకి ఫుల్ డిమాండ్ ఉంది. కాగా, నిన్న మంగ్లీ ప్రయాణిస్తున్న కారుకు ప్రమాదం జరిగింది. ఈ ఘటనలో పలువురికి గాయాలయ్యాయి.
మంగ్లీ ఆదివారం రంగారెడ్డి జిల్లా నందిగామ మండలం కన్హా శాంతివనంలో ప్రపంచ ఆధ్యాత్మిక మహోత్సవానికి హాజరైంది. అక్కడ పనులన్నీ పూర్తి చేసుకున్న తర్వాత ఆమె నేరుగా ఇంటికి వెళ్లాలని నిర్ణయించుకుంది. అలా ఈవెంట్ ముగిసిన తర్వాత అంటే అర్ధరాత్రి సమయంలో మేఘ్ రాజ్, మనోహర్ లతో కలిసి ఆమె కారులో హైదరాబాద్ బయలుదేరింది. బెంగళూర్ నేషనల్ హైవే మీదుగా వెళ్తున్న టైంలో శంషాబాద్ మండలం తొండుపల్లి బ్రిడ్జి వద్ద మంగ్లీ కారుకు ప్రమాదం జరిగింది.
మంగ్లీ ప్రయాణిస్తున్న కారును ఓ డీసీఎం వాహనం వెనక నుంచి వేగంగా వచ్చి ఢీకొట్టింది. ఈ ఘటనలో ఆమెతో పాటు కారులో ఉన్న ఇద్దరికీ స్వల్ప గాయాలయ్యాయి. దీంతో ఆ తర్వాత స్థానికుల సహాయంతో క్షతగాత్రులు నేరుగా హాస్పిటల్ కు వెళ్లి చికిత్స చేయించుకున్నారు. ఈ ప్రమాదంలో మంగ్లీ కారు వెనక భాగం పూర్తిగా దెబ్బతింది. ఈ ఘటనపై పోలీసులకు ఫిర్యాదు అందగా.. వాళ్లు కేసు నమోదు చేసుకుని విచారణ ప్రారంభించారు. ఈ ప్రమాదంలో ఎలాంటి ప్రాణనష్టం జరగకపోవడంతో అంతా ఊపిరి పీల్చుకున్నారు.
ఇదిలా ఉండగా మంగ్లీ కారును ఢీకొట్టిన డీసీఎం వ్యాన్ డ్రైవర్ ను పోలీసులు అదుపులోకి తీసుకున్నారు. ప్రమాదం జరిగిన సమయంలో అతడు మద్యం తాగినట్టు గుర్తించారు. మొత్తానికి ప్రమాదంలో మంగ్లీ స్వల్ప గాయాలతో సురక్షితంగా బయటపడింది.