Kannappa:మంచు విష్ణు `క‌న్న‌ప్ప` కోసం అంత మంది హాలీవుడ్ టెక్నీషియ‌న్‌లా?
Kannappa:మంచు విష్ణు క‌థానాయ‌కుడిగా న‌టిస్తూ నిర్మిస్తున్న ప్ర‌తిష్టాత్మ‌క ప్రాజెక్ట్ `క‌న్న‌ప్ప`.కొన్నేళ్ల క్రితం రెబ‌ల్ స్టార్ కృష్ణంరాజు ఇదే క‌థ‌తో `భ‌క్త‌క‌న్న‌ప్ప` సినిమా చేయ‌డం, అది సంచ‌ల‌న విజ‌యాన్ని సొంతం చేసుకోవ‌డం తెలిసిందే. మ‌ళ్లీ ఇన్నేళ్ల‌కు శివ భ‌క్తుడి క‌థ‌తో `క‌న్న‌ప్ప` సినిమాని అత్యంత భారీ స్థాయిలో నిర్మిస్తున్నారు. మంచు విష్ణు డ్రీమ్ ప్రాజెక్ట్‌గా రూపొందుతున్న ఈ మూవీకి `మ‌హాభార‌త` సిరీస్‌ని రూపొందించిన ముఖేష్ కుమార్‌ద‌ర్శ‌క‌త్వం వ‌హిస్తున్నారు.
ఇటీవ‌లే ఈ సినిమా రెగ్యుల‌ర్ షూటింగ్ న్యూజిలాండ్‌లో మొద‌లైంది. భారీ తారాగ‌ణంతో అత్యంత భారీ స్థాయిలో రూపొందుతున్న ఈ సినిమాకు సంబంధించిన తాజా అప్ డేట్‌ని న‌టుడు మోహ‌న్‌బాబు శ‌నివారం అభిమానుల‌తో పంచుకున్నారు. “క‌న్న‌ప్ప` కోసం హాలీవుడ్‌కు చెందిన 600 మంది వ‌ర్క్ చేశారు. ఈ సినిమాలోని కీల‌క పాత్ర‌ల్లో భార‌త‌దేశంలోని ఎంతో మంది అగ్ర‌న‌టీన‌టులు న‌టిస్తున్నారు. 90 రోజుల పాటు జ‌రిగిన మొద‌టి షెడ్యూల్‌లో థాయ్‌లాండ్‌కు చెందిన సాంకేతిక నిపుణులు భాగ‌మ‌య్యారు.
న్యూజిలాండ్‌లోని ఎంతో అద్భుత‌మైన లొకేష‌న్‌ల‌లో తొలి షెడ్యూల్ పూర్త‌యింది. దేవుడి ద‌య‌వ‌ల్ల అనుకున్న విధంగా దిగ్విజ‌యంగా పూర్తి చేసి భార‌త్‌కు వ‌స్తున్నాం` అని తెలిపారు. ఈ పోస్ట్‌తో పాటు లొకేష‌న్‌లో దిగిన ఓ ఫొటోని పంచుకున్న మోహ‌న్ బాబు దీనికి ప్రభాస్ హ్యాష్ ట్యాగ్‌ను జోడించ‌డం గ‌మ‌నార్హం. ప్రీతి ముకుంద‌న్ హీరోయిన్‌గా న‌టిస్తున్న ఈ సినిమాలోని కీల‌క పాత్ర‌ల్లో శివ పార్వ‌తులుగా ప్రభాస్, న‌య‌న‌తార క‌నిపించ‌నున్నారు. ఇత‌ర కీల‌క పాత్ర‌ల్లో క‌న్న‌డ స్టార్ హీరో శివ‌రాజ్ కుమార్‌, మ‌ల‌యాళ స్టార్ మోహ‌న్‌లాల్‌, శ‌ర‌త్ కుమార్‌ల‌తో పాటు మోహ‌న్‌బాబు కూడా ఓ కీల‌క పాత్ర‌లో న‌టిస్తున్నారు.