Venu Swami : వేణు స్వామి.. గుర్తుపెట్టుకోండి.. ఈ పేరు వినిపిస్తానే ఉంటాది

Venu Swami

Venu Swami : ‘భగవంత్ కేసరి’ సినిమా ప్రమోషన్స్‌లో యూనిట్ ఎక్కువగా వాడిన డైలాగ్.. ‘భగవంత్ కేసరి.. ఈ పేరు చానా ఏళ్లు యాదుంటాది’. అలాగే వేణు స్వామి పేరు గుర్తుపెట్టుకోండి.. ఈ పేరు కూడా ఏదో ఒక మ్యాటర్‌పై వినిపిస్తానే ఉంటాది అని చెప్పుకోవాలి. ఎందుకంటే, 2023లో సినిమా సెలబ్రిటీల పేర్లు ఎలా అయితే వైరల్ అయ్యాయో.. ఈ వేణు స్వామి పేరు కూడా అంతే స్థాయిలో వైరలైంది. మరీ ముఖ్యంగా సమంత, చైతూల విడాకులు.. తారకరత్న మరణం, రష్మిక మందన్నా, తెలంగాణ సీఎం వంటి విషయాలతో పాటు హీరోయిన్లు జరిపించుకున్న పూజలతో వేణు స్వామి పేరు టాక్ ఆఫ్ ద తెలుగు స్టేట్స్‌గా మారింది. ఇది అందరికీ తెలిసిన విషయమే.

అయితే వేణు స్వామి టాలెంట్ గురించి ఇంకో వార్త ఇప్పుడు టాలీవుడ్ సర్కిల్స్‌లో వైరల్ అవుతోంది. అదేంటని అనుకుంటున్నారా? వాస్తవానికి జ్యోతిష్యం, భవిష్యత్ చెబుతానంటే కొందరు నమ్మరు, కొందరు నమ్ముతారు. కానీ, మాటలు చెప్పి బతకడానికి కూడా టాలెంట్ కావాలి. చెప్పిన వాటిలో ఏదో ఒకటీ అరా నిజమైతే.. ఇక నేను చెప్పిందే జరిగిందని.. వేణు స్వామి లాంటి వాళ్లు హడావుడి చేస్తుంటారు. జ్యోతిష్యం పేరుతో ఆయన చాలా చెప్పాడు. ప్రభాస్‌కి ఇప్పటిలో హిట్ సినిమా అనేది రాదు అని చెప్పాడు. ‘సలార్’తో ప్రభాస్ బాక్సాఫీస్ దగ్గర దుమ్మురేపుతున్నాడు. అలా చాలా ఉన్నాయి.

అలాగే తెలంగాణ సీఎంగా మళ్లీ కేసీఆరే గెలుస్తాడని ఒక వీడియోలో, కేసీఆర్ గెలవడు అని మరొక వీడియోలో వేణు స్వామి చెబుతున్న మాటలు ఈ మధ్య బాగా హాట్ టాపిక్ అయ్యాయి. కట్ చేస్తే, ఎవరు తెలంగాణ సీఎం అయ్యారో తెలుసు కదా. అలాగే.. ఎక్కడో ఒకటి ఆయన చెప్పింది నిజం అవుతుంది అంతే. దాన్నే పట్టుకుని నేను తోపు, తురుము అంటూ డబ్బా కొట్టుకోవడం అనేది మాములే. ఇక విషయంలోకి వస్తే.. వేణు స్వామిలో ఉన్న టాలెంట్ విషయానికి వస్తే.. ఆయన జ్యోతిష్యమే కాదు.. నటుడిగా కూడా కొన్ని సినిమాలలో నటించారు. ఆయన యాక్ట్ చేసిన ఓ సినిమా క్లిప్ ప్రస్తుతం సోషల్ మాధ్యమాలలో సందడి చేస్తోంది.

అప్పుడెప్పుడో సూపర్ స్టార్ మహేష్ బాబు సినిమాలో నటించినట్లుగా.. ఆ మధ్య ఓ పిక్ వైరల్ అయినట్లే.. ఇప్పుడాయన నటించిన పాత వీడియో ఒకటి దర్శనమిచ్చింది. అందులో పూజారిగా వేణు స్వామి నటించారు. 2005లో జగపతిబాబు, రక్షిత హీరోహీరోయిన్లుగా నటించిన ‘జగపతి’ అనే సినిమాలో వేణు స్వామి పూజారిగా నటించాడు. ఈ సినిమాలో హీరో స్వభావం గురించి హీరోయిన్‌కి వేణు స్వామి చెప్పే సీన్ ఒకటి ఉంది. ఆ సీన్‌ని కట్ చేసి ఎవరో సోషల్ మీడియాలో వదిలారు. అంతే.. స్వామివారి టాలెంట్ చూశారా.. అంటూ ఒకటే కామెంట్స్. అందుకే చెప్పింది.. ఈ పేరు వినిపిస్తానే ఉంటాది అని. అదన్నమాట మ్యాటర్.