#Venky ReRelease Trailer:మాస్ మ‌హారాజా `వెంకీ` రీ రిలీజ్ ట్రైల‌ర్ వ‌చ్చేసింది
#Venky ReRelease Trailer:టాలీవుడ్‌లో రీ రిలీజ్‌ల ట్రెండ్ న‌డుస్తోంది. క్రేజీ హీరోల కెరీర్‌ల‌ని మ‌లుపు తిప్పిన బ్లాక్ బ‌స్ట‌ర్ సినిమాల‌ని వారి పుట్టిన రోజుల సంద‌ర్భంగా రీ రిలీజ్‌లు చేస్తూ అభిమానుల్ని స‌ర్ ప్రైజ్ చేస్తున్న విష‌యం తెలిసిందే. టాలీవుడ్‌లో ఈ ట్రెండ్‌కు సూప‌ర్ స్టార్ మ‌హేష్ బాబు న‌టించిన ఇండ‌స్ట్రీ హిట్`పోకిరి`లో ప్రారంభించారు. ఇప్ప‌టి వ‌ర‌కు ఇలా ఎంతో మంది స్టార్ హీరోల‌కు సంబంధించిన క్రేజీ హిట్ సినిమాలు రీ రిలీజ్ అయి బాక్సాఫీస్ వ‌ద్ద సంచ‌ల‌నం సృష్టించిన భారీ వ‌సూళ్ల‌ని రాబ‌ట్టాయి.
తాజాగా ఇదే కోవ‌లో మ‌రో స్టార్ హీరో సినిమా రీ రిలీజ్ అవుతోంది. మాస్ మ‌హారాజా ర‌వితేజ న‌టించిన `వెంకీ` సినిమా ఈ నెల 30న రీ రిలీజ్ అవుతోంది. ర‌వితేజ హీరోగా శ్రీ‌ను వైట్ల ద‌ర్శ‌క‌త్వంలో ఈ మూవీని రూపొందించారు. 2004లో వ‌చ్చిన ఈ సినిమా కామెడీ సీన్‌లు, మాస్ రాజా ర‌వితేజ మార్కు న‌ట‌న‌తో ప్రేక్ష‌కుల్ని విశేషంగా ఆక‌ట్టుకుంది. స్నేహ హీరోయిన్‌గా న‌టించిన ఈ మూవీలో బాలీవుడ్ న‌టుడు అశుతోష్ రాణా విల‌న్‌గా న‌టించారు.
ఈ సినిమాలోని ట్రైన్ ఎపిసోడ్ సినిమాకు ప్ర‌ధాన హైలైట్‌గా నిలిచి ప్రేక్ష‌కుల్ని క‌డుపుబ్బా న‌వ్వించిన విష‌యం తెలిసిందే. పోలీస్ ట్రైనింగ్ కోసం త‌న స్నేహితుల‌తో క‌లిసి వెళ్లిన హీరోకు హీరోయిన్ ప‌రిచ‌యం కావ‌డం, త‌న‌ని కాపాడేందుకు హీరో సాహ‌సానికి పూనుకోవ‌డం, ఈ క్ర‌మంలో వ‌చ్చే కామెడీ స‌న్నివేశాలు ప్రేక్ష‌కుల్ని విశేషంగా ఆక‌ట్టుకుని ర‌వితేజ కెరీర్‌లో `వెంకీ` సినిమాని మ‌ర్చిపోలేని మూవీగా నిలిపింది. డిసెంబ‌ర్ 30న రీ రిలీజ్ కానున్న నేప‌థ్యంలో ఆదివారం ఈ మూవీ రీ రిలీజ్ ట్రైల‌ర్‌ని విడుద‌ల చేశారు. మ‌రో సారి థియేట‌ర్ల‌లోకి రాబోతున్న ఈ సినిమా ఏ స్థాయిలో వ‌సూళ్ల‌ని రాబ‌డుతుందో వేచి చూడాల్పిందే.