Pushpa : నిన్నటి దాకా బాహుబలి వర్సెస్ బాలీవుడ్.. ఇప్పడు పుష్ప లైన్‌లోకి వస్తున్నాడా?

Pushpa VS Bahubali : ఒక్క సినిమా ఇటు టాలీవుడ్ తో అటు బాలీవుడ్ రికార్డులను కూడా బ్రేక్ చేసింది. ఇండియన్ సినిమా హిస్టరీ రికార్డులను తిరగరాసింది. ఆ సినిమా బాహుబలి. ఈ సినిమా దర్శకుడికే కాకుండా హీరో ప్రభాస్ కెరీర్ ను సంపూర్ణంగా మార్చేసింది. ఇక కీ రోల్ చేసిన రమ్యకృష్ణ హీరోయిన్ గా చేసినప్పటి గ్లామర్ క్యారెక్టర్ల కంటే శివగామి గా ముద్రపడిపోయింది. 30 ఏళ్ల కెరీర్ లో  ఎన్నో చిత్రాలు చేసిన రమ్యకృష్ణకు శివగామి రోల్ తెచ్చిన ఖ్యాతి అంతా ఇంతా కాదు.

ఇక ఇదే సినిమాలో సత్యరాజ్ చేసిన కట్టప్ప క్యారెక్టర్ దేశవ్యాప్తంగా చర్చనీయాంశమైంది. దేశ ప్రధాని కూడా కట్టప్ప క్యారెక్టర్ గురించి అడిగాడంటే ఈ సినిమా ఎంత ప్రభావం చూపిందో అర్థం చేసుకోవచ్చు. బాహుబలి తర్వాత మళ్లీ అంత క్యూరియాసిటీ పెంచుతున్న చిత్రం పుష్ప-2. ఈ సినిమా కూడా టాలీవుడ్ దే కావడం విశేషం. మొన్నటి దాకా బాహుబలి రికార్డ్స్, నాన్ బాహుబాలి రికార్డ్స్  అని లెక్కలు వేశారు. ఇప్పుడు ఆ లెక్కలను తారుమారు చేయబోతున్నాడా అనే ప్రశ్నలు ఉత్పన్నవుతున్నాయి.

ఆ లెక్కలకు కారణాలివే..
మూడేళ్ల క్రితం పుష్ప సినిమా దేశ వ్యాప్తంగా సంచలనం సృష్టించిన విషయం తెలిసిందే. ఇప్పడు పుష్ప-2 కూడా విడుదలకు ముందే ఎన్నో సంచలనాలకు కేంద్రబిందువవుతున్నది. పుష్ప-2 విడుదలకు వెయ్యి కోట్లకుపైగా ప్రీ రిలీజ్ బిజినెస్ చేసిందనే న్యూస్ సంచలనంగా మారింది. దాదాపు 11వేల స్ర్కీన్లలో ఈ సినిమా ప్రదర్శితం కాబోతున్నది. దీంతో బాహుబలి రికార్డులను పుష్ప-2 అధిగమిస్తుందని ట్రేడ్ పండితులు లెక్కలేస్తున్నారు.

బాహుబలిలో  ఇద్దరు హీరోలను పెట్టి తీసిన రాజమౌళి.. ఆర్ఆర్ఆర్ లోనూ ఇద్దరు టాప్ హీరోలతో మరోసారి అలాంటి ప్రయోగమే చేశాడు. ఆర్ఆర్ఆర్ ఓపెనింగ్స్ బాహుబలిని మించినా 2వేల కోట్ల క్లోజింగ్ కలెక్షన్లను దాటలేపోయింది. ఇక పుష్ప -2లో బన్నీ ఒక్కడే హీరో. మరి బాహుబలి-2 రికార్డులను కొట్టడం అంత ఈజీ కాదు. షారూఖ్ ఖాన్ హీరోగా సౌత్ టాప్ డైరెక్టర్ తీసిన జవాన్ కూడా బాహుబలి రికార్డులను అధిగమిస్తుందనుకున్నారు. కానీ సాధ్యపడలేదు. సినిమాలో విషయం ఉంటే తప్ప బాహుబలి-2 రికార్డులను సాధించడం అంత సులువు కాదనే వాదన కూడా వినిపిస్తున్నది. మరో నెల రోజుల్లో విడుదల కానున్న పుష్ప2 ఏ రేంజ్ హిట్టవుతుందో వేచి చూడాల్సిందే.