UK Election
UK election : యూకే ఎన్నికల ఫలితాల వేళ.. భారత ప్రధాని మోదీ పోస్టు పెట్టారు. బ్రిటన్ పార్లమెంట్ ఎన్నికల్లో అధికార కన్జర్వేటివ్ పార్టీని ఓడించి లేబర్ పార్టీ భారీ విజయాన్ని నమోదు చేసింది. తదుపరి ప్రధానిగా బాధ్యతలు చేపట్టనున్న కీర్ స్టార్మర్ కు పీఎం మోదీ అభినందనలు తెలియజేశారు. అలాగే భారత అల్లుడు, ఇంతకాలం ఆ దేశ ప్రధానిగా బాధ్యతలు నిర్వహించిన రిషి సునాక్ ను ప్రశంసించారు. ‘‘అనిర్వచనీయమైన విజయాన్ని దక్కించుకున్న కీర్ స్టార్మర్ కు హృదయపూర్వక అభినందనలు. అన్ని రంగాల్లో భారత్-యూకే సంబంధాల బలోపేతం దిశగా నిర్మాణాత్మక సహకారం ఉంటుందని ఆశిస్తున్నాం’’ అని మోదీ ఎక్స్ ఖాతాలో పేర్కొన్నారు.
అలాగే సునాక్ ను ఉద్దేశించి మరో పోస్టు పెట్టారు. యూకేను పాలించడంలో అద్భుతమైన పనితీరు చూపారని ప్రశంసించారు. ప్రధానిగా ఉన్న సమయంలో రెండు దేవాల బంధం బలోపేతం దిశగా చూపిన చొరవకు కృతజ్ఞతలు తెలియజేశారు. భవిష్యత్తు ప్రయాణం బాగండాలని ఆకాంక్షిస్తూ సునాక్ తో పాటు ఆయన కుటుంబానికి ఆల్ ది బెస్ట్ చెప్పారు.
శుక్రవారం జరిగిన ఎన్నికల కౌటింగ్ లో లేబర్ పార్టీ నాలుగు వందలకు పైగా సీట్లు దక్కించుకోగా, కన్జర్వేటివ్ పార్టీ 120 సీట్ల దగ్గర ఆగిపోయింది. పార్టీ ఘోర పరాభవానికి తాను బాధ్యత వహిస్తున్నట్లు ఇప్పటికే సునాక్ ప్రకటించిన సంగతి తెలిసిందే. రెండేళ్ల క్రితం ప్రధానిగా ఎన్నికైన రిషి సునాక్ ఈ పదవి చేపట్టిన తొలి భారత సంతతి వ్యక్తిగా చరిత్ర సృష్టించారు.