Scotland : స్కాట్లాండ్ లో ఇద్దరు తెలుగు విద్యార్థులు మృతి – ట్రెక్కింగ్ చేస్తుండగా ప్రమాదం

Scotland

Scotland : స్కాట్లాండ్ లో ఉన్నత చదువుల కోసం వెళ్లిన ఇద్దరు తెలుగు విద్యార్థులు ట్రెక్కింగ్ చేస్తూ ప్రమాదవశాత్తు నీటిలో పడి మృతి చెందారు. జితేంద్రనాథ్ కరుటూరి (26), చాణక్య బొలిశెట్టి (22) స్కాట్లాండ్ లోని డూండీ యూనివర్సిటీలో మాస్టర్స్ చదువుతున్నారు.  బుధవారం సాయంత్రం వారిద్దరు మరికొందరు భారతీయులతో కలిసి పెర్త్ షైర్ లో రెండు నదులు కలిసే లిన్ ఆఫ్ తమ్మెల్ కి వెళ్లారు. అక్కడ వీరు ట్రెక్కింగ్ చేస్తుండగా ప్రమాదవశాత్తు నీటిలో జారిపడి గల్లంతయ్యారు.

సమాచారమందుకున్న సహాయక సిబ్బంది వెంటనే అక్కడకు చేరుకుని గాలింపు చర్యలు చేపట్టగా ఘటన స్థలానికి కొంత దూరంలో వీరి మృతదేహాలు లభించాయి. లండన్ లోని భారత హైకమిషన్ అధికారి ఒకరు మాట్లాడుతూ మృతుల కుటుంబాలకు సమాచారం అందించామని, పోస్టుమార్టం అనంతరం మృతదేహాలను భారత దేశానికి పంపించే ఏర్పాట్లు చేస్తున్నట్లు తెలిపారు.