Trump Tariff : అమెరికా అధ్యక్షుడు డొనాల్డ్‌ ట్రంప్‌ అనుసరిస్తున్న వాణిజ్య విధానాలు మరోసారి ప్రపంచ ఆర్థిక వ్యవస్థను కలవరపెడుతున్నాయి. దిగుమతులపై ఆయన విధిస్తున్న భారీ సుంకాలు అమెరికాను మరోసారి ఆర్థిక మాంద్యం వైపు నెట్టే ప్రమాదం ఉందని ఆర్థిక నిపుణులు హెచ్చరిస్తున్నారు. గతంలో అమెరికా అనుసరించిన ‘స్మూత్‌-హాలీ’ తరహా విధానాలే 1930 నాటి మహా మాంద్యానికి ప్రధాన కారణమని వారు గుర్తు చేస్తున్నారు. ఇప్పుడు ట్రంప్‌ కూడా అదే బాటలో పయనిస్తూ మాంద్యానికి బీజాలు వేస్తున్నారని విమర్శిస్తున్నారు.
ట్రంప్‌ తన ప్రతీకార సుంకాలను ‘విమోచన దినోత్సవం’గా అభివర్ణిస్తుంటే, ఆర్థికవేత్తలు మాత్రం దీనిని ‘మాంద్యం దినోత్సవం’గా పరిగణిస్తున్నారు. ఈ సుంకల ప్రభావం ఇప్పటికే పలు రంగాలపై పడటం మొదలైంది. ముఖ్యంగా భారత్‌ వంటి దేశాల నుంచి అమెరికాకు ఎగుమతి అయ్యే ఉత్పత్తులపై ఇది తీవ్ర ప్రభావం చూపుతోంది.
తాజాగా ట్రంప్‌ తీసుకున్న ఒక నిర్ణయం భారతీయ ఆక్వా రంగానికి పెను నష్టం కలిగిస్తోంది. భారత్‌ నుంచి దిగుమతి అయ్యే రొయ్యలపై అమెరికా దిగుమతి సుంకాన్ని భారీగా పెంచింది. ఈ నిర్ణయంతో గంటల వ్యవధిలోనే భారతీయ రొయ్యల ధరలు ఒక్కసారిగా పతనమయ్యాయి. ఆంధ్రప్రదేశ్‌లోని పశ్చిమ గోదావరి జిల్లాలో కిలో రొయ్యల ధర గరిష్ఠంగా రూ.40 వరకు పడిపోయింది. పెట్టుబడి ఖర్చులు పెరిగి ఇబ్బందుల్లో ఉన్న ఆక్వా రైతులకు ఇది మరింత భారంగా మారింది.
భారత్‌ నుంచి విదేశాలకు ఎగుమతి అవుతున్న మాంస ఉత్పత్తుల్లో రొయ్యలు మూడో స్థానంలో ఉన్నాయి. ఆంధ్రప్రదేశ్‌లో ఉమ్మడి పశ్చిమ గోదావరి జిల్లా నుంచే అత్యధికంగా ఆక్వా ఉత్పత్తులు ఎగుమతి అవుతుంటాయి. ఈ ఒక్క జిల్లాలోనే దాదాపు 1.20 లక్షల ఎకరాల్లో రొయ్యల సాగు జరుగుతోంది. అమెరికా సుంకాల పెంపుతో ఇక్కడి రైతులు తీవ్రంగా నష్టపోయే అవకాశం ఉంది.
ట్రంప్‌ తీసుకుంటున్న ఇటువంటి ఏకపక్ష నిర్ణయాలు ప్రపంచ వాణిజ్య సంబంధాలను దెబ్బతీస్తున్నాయి. ఒకవైపు అమెరికా ఆర్థిక వ్యవస్థ మాంద్యం ముప్పును ఎదుర్కొంటుండగా, మరోవైపు భారత్‌ వంటి దేశాల్లోని ఎగుమతిదారులు నష్టపోతున్నారు. ఈ పరిణామాలు రానున్న రోజుల్లో అంతర్జాతీయ ఆర్థిక వ్యవస్థపై ఎలాంటి ప్రభావం చూపుతాయో వేచి చూడాలి.