Hemachand Manjhi : నక్సలైట్ల నుంచి బెదిరింపులు.. పద్మశ్రీ వెనక్కి ఇచ్చేస్తున్న హేమచంద్ మాంఝీ

Hemachand Manjhi

Hemachand Manjhi : సాంప్రదాయ వైద్య అభ్యాసకుడు హేమచంద్ మాంఝీ కీలక నిర్ణయం తీసుకున్నారు. తనకు ప్రభుత్వం ఇచ్చిన పద్మశ్రీ అవార్డును తిరిగి ఇస్తున్నట్లు ప్రకటించారు. తనకు నక్సలైట్ల నుంచి బెదిరింపులు వస్తుండడంతో అవార్డును తిరిగి ఇచ్చేస్తానని చెప్పారు.  మే 27న తనకు బెదిరింపు కాల్స వచ్చాయని తెలిపారు. తన కుటుంబ సభ్యులతో మాట్లాడిన తర్వాత పద్మశ్రీ అవార్డును తిరిగి ఇవ్వాలని నిర్ణయించుకున్నట్లు హేమచంద్ తెలిపారు.

అంతేకాకుండా వైద్యరాజ్ గా ప్రసిద్ధి చెందిన మాంఝీ తన అభ్యాసాన్ని కూడా విరమించుకుంటానని చెప్పారు. గతంలో తన మేనకోడలు కోమల్ మాంఝీపై తప్పుడు ఆరోపణలు చేసి నక్సలైట్లు హతమార్చారని, అప్పటి నుంచి తన కుటుంబం భయం గుప్పిట్లో బతుకుతున్నట్లు తెలిపారు. నక్సలైట్ల బెదిరింపుల క్రమంలో ప్రస్తుతం హేమచంద్ కుటుంబానికి స్థానిక పోలీసులు భద్రత కల్పించారు.