Box Office
Box Office : మార్చి నెల బాక్సాఫీస్ జాతకం బాగోలేనట్టు ఉంది. సంక్రాంతి తర్వాత సరైన సక్సెస్ లేదు టాలీవుడ్ లో. గత వారం కూడా పెద్దగా వర్కవుట్ కాలేదు. ఏకంగా ఏడెనిమిది సినిమాలు వరుస కట్టినా, ఒక్క సినిమాకు సరైన ఫలితం రాలేదు. ‘రజాకార్’ చిత్రానికి ప్రశంసలు దక్కినా కమర్షియల్ రిజల్ట్ మాత్రం శూన్యం. అయితే ఈ వారం పరిస్థితి కాస్త ఆశాజనకంగా ఉండొచ్చు అనిపిస్తోంది.
ఈ వారం ‘ఓం భీమ్ భుష్’ వస్తోంది. శ్రీవిష్ణు కథానాయకుడిగా నటించిన సినిమా ఇది. ప్రియదర్శి, రాహుల్ రామకృష్ణ కీలక పాత్రలు పోషించారు. ‘హుషారు’ ఫేమ్ హర్ష దర్శకత్వం వహించిన ఈ మూవీపై మంచి అంచనాలే ఉన్నాయి. టీజర్, ట్రైలర్ ఆకట్టుకున్నాయి. పైగా ప్రమోషన్ కూడా బాగుంది. ఇక ప్రియదర్శి, రాహుల్ ది కలిసొచ్చిన కాంబినేషన్. ఇక హీరో శ్రీవిష్ణు ‘సామజవరగమన..’తో మంచి విజయాన్ని రాబట్టుకుని ఫామ్ లో ఉన్నాడు. కాబట్టి ఈసినిమాపై కొన్ని ఆశలు పెట్టుకోవచ్చు. మంచి కామెడీ సినిమా వచ్చి కూడా చాలా రోజులైంది. ఈ సినిమా ఆ కొరతను తీర్చే అవకాశాలు ఉన్నాయి.
ఇక పరీక్షలు, ఐపీఎల్, ఎన్నికలు, కారణాల వల్ల సమ్మర్ లో పెద్ద సినిమాలు రిలీజ్ కావడం కష్టమే. చిన్న సినిమాలు తమ సత్తా చూపించుకోవడానికి ఇదే మంచి సమయం. థియేటర్లలో హిట్ టాక్ వచ్చినా, రాకపోయినా ఓ మోస్తారుగా ఉన్న ఓటీటీలో ఆదరణ లభించడం ఖాయం. మొత్తానికైతే మార్చి నెల ఇండస్ట్రీకి కలిసిరాలేదు.