IPL 2024 : ఉప్పల్ స్టేడియంలో జరిగే ఐపీఎల్ మ్యాచ్ లివే..

IPL 2024

IPL 2024 : ఐపీఎల్ సంబరాలు ఇవ్వాళ్టి నుంచి మొదలుకాబోతున్నాయి. సమ్మర్ సీజన్ అంతా ఐపీఎల్ మజా ఉండబోతోంది. ఇప్పటికే క్రికెట్ ఫ్యాన్స్ పొట్టి ఆటకు రెడీ అయిపోయారు. ఈసారి కప్ కోసం నిరుటి లాగానే పది జట్లు పోటీ పడుతున్నాయి. మన సన్ రైజర్స్ యంగ్ టీంతో బరిలోకి దిగుతోంది. తొలి దశ టోర్నీ షెడ్యూల్ ప్రకారం హైదరాబాద్ లోని ఉప్పల్ స్టేడియంలో పలు మ్యాచ్ లు నిర్వహించనున్నారు. ఈ నేపథ్యంలో నగరంలో భద్రతా ఏర్పాట్లపై చర్చించేందుకు పోలీసులు ఇటీవల ఓ సమావేశాన్ని కూడా ఏర్పాటు చేశారు. మ్యాచ్ లు సజావుగా సాగేందుకు అవసరమైన చర్యలు తీసుకుంటున్నామని చెప్పారు. ఐపీఎల్ తొలి దశ షెడ్యూల్ ప్రకారం నగరంలో జరిగే మ్యాచ్ లు ఇవే..

1. సన్ రైజర్స్ హైదరాబాద్ వర్సెస్ ముంబై ఇండియన్స్
2. సన్ రైజర్స్ హైదరాబాద్ వర్సెస్ చెన్నై సూపర్ కింగ్స్

ముంబై ఇండియన్స్ తో ఆడే తొలి మ్యాచ్ మార్చి 27న జరుగనుంది. చెన్నై సూపర్ కింగ్స్ తో ఆడే మ్యాచ్ ఏప్రిల్ 5న నిర్వహించనున్నారు. ఉప్పల్ స్టేడియంలో తొలి దశలో కేవలం రెండు మ్యాచ్ లే జరుగనున్నాయి. త్వరలోనే రెండో దశ మ్యాచ్ ల షెడ్యూల్ ప్రకటిస్తే మరిన్ని మ్యాచ్ లు ఉప్పల్ స్టేడియంలో నిర్వహించే అవకాశాలు ఉన్నాయి.

కాగా, ఐపీఎల్ సందర్భంగా రెండు తెలుగు రాష్ట్రాల క్రికెట్ అభిమానులకు పోలీసులు ఓ సూచన చేస్తున్నారు. బెట్టింగ్ చేయడానికి ప్రయత్నించవద్దని, అది మీ జీవితాన్ని నాశనం చేస్తుందని, మీ కుటుంబ సభ్యులను రోడ్డుపైకి తెస్తుందని హెచ్చరిస్తున్నారు. బెట్టింగ్ జోలికి వెళ్లకుండా ఆటను ఆస్వాదించాలని సూచిస్తున్నారు.