Chandrababu’s Convoy
Chandrababu’s Convoy : టీడీపీ అధినేత నారా చంద్రబాబు నాయుడు కూటమి ఎమ్మెల్యేలతో కలిసి విజయవాడలోని ఏ కన్వెన్షన్ సెంటర్ లో సమావేశానికి హాజరయ్యారు. ఆయనను చూసేందుకు జనాలు పెద్ద ఎత్తున రోడ్లమీదకు వచ్చారు. టీడీపీ కార్యకర్తలు, అభిమానులు దారి పొడవునా ఘన స్వాగతం పలికారు. అయితే సమావేశం అనంతరం చంద్రబాబు ఉండవల్లిలోని తన నివాసానికి బయల్దేరారు. ఇంతలో ఓ మహిళ చంద్రబాబు నాయుడు కాన్వాయ్ వెంట దగ్గర పరుగులు తీశారు. అలా మహిళ పరిగెత్తడం చూసి ఏం జరుగుతుందో తెలియక సెక్యూరిటీ సిబ్బంది అలర్ట్ అయ్యారు. అయినా ఆమె ఏ మాత్రం ఆగకుండా.. చంద్రబాబు కాన్వాయ్ వెంట పరుగులు తీసింది.
ఆ మహిళను కారులో నుంచి గమనించిన చంద్రబాబు తన కాన్వాయ్‌ను ఆపారు. ఆ మహిళను దగ్గరకు పిలిచి మాట్లాడారు. ఆ మహిళ చంద్రబాబును ఆప్యాయంగా పలకరించారు.. తాను మదనపల్లి నుంచి వచ్చినట్లు చెప్పారు. తన పేరు నందిని అని.. చంద్రబాబుపై అభిమానంతో చూడడానికి వచ్చానని తెలిపారు. తనను చూసి ఎమోషనల్ అయిన చంద్రబాబు ఆ మహిళతో కొద్దిసేపు మాట్లాడారు. సెక్యూరిటీని వారించి మరీ ఆమె వివరాలు అడిగి తెలుసుకున్నారు.
ఈ సందర్భంగా ఆ మహిళ మాట్లాడుతూ.. తమ కష్టం ఫలించి.. తమ కోరిక మేరకు ‘మీరు సీఎం అయ్యారు సార్’ అంటూ ఆమె ఒక్కసారిగా.. ‘మీ కాళ్లు మొక్కుతాను’ సార్ అన్నారు. చంద్రబాబు వద్దని ఆమెను సున్నితంగా వారించారు. ఆమెను ఆప్యాయంగా పలకరించి ఫోటో దిగారు. తనకు 104 జ్వరం ఉన్నా చూడాలని వచ్చానని నందిని చెప్పగా.. ముందు ఆసుపత్రికి వెళ్లమ్మా అంటూ సున్నితంగా అక్కడి నుంచి పంపించి వేశారు. ఆమె ఎక్కడ ఉంటారో తెలుసుకుని.. అవసరమైన వైద్యం సాయం చేయాలని పార్టీ కార్యకర్తలకు చంద్రబాబు నాయుడు సూచించారు. ప్రస్తుతం ఈ ఫోటోలు వైరల్ అవుతున్నాయి.