Star heroine : బాయ్ కాట్ ట్రెండ్ మళ్లీ మొదలు.. ఈసారి సౌత్ స్టార్ హీరోయిన్ బలి

star heroine Sai Pallavi : సోషల్ మీడియాలో రోజుకో అంశం ట్రెండింగ్ లో నిలుస్తున్న విషయం తెలిసిందే. అయితే కొంత కాలంగా బాయ్ కాట్ ట్రెండ్ కూడా ఎక్కువవుతున్నది. బాలీవుడ్ లో సుశాంత్ సింగ్ ఆత్మహత్య నుంచి ట్విట్టర్ లో ఈ బాయ్ కాట్ నినాదం మొదలైందని చెప్పవచ్చు. ఆ తర్వాత పలువురు బాలీవుడ్ హీరోలకు కూడా ఈ బెడద తప్పలేదు.  ఈ బాయ్ కాట్ లో అమిర్ ఖాన్ కు సెగ బాగానే తగిలింది. లాల్ సింగ్ చద్దా సినిమాపై ఈ ప్రభావం పడింది. ఆ తర్వాత బాయ్ కాట్ అంశం పెద్ద గా  బయటకు రాలేదు. కానీ గత వారం నుంచి ఈ బాయ్ కాట్ నినాదం ఊపందుకుంది. ఇందులో సౌత్ స్టార్ హీరోయిన్ సాయి పల్లవి ట్రోల్ అవుతున్నది.

సాయి పల్లవి ట్రోల్ కావడానికి కారణమేంటి?
తెలుగులో రానా హీరోగా హీరోగా తెరకెక్కిన విరాట పర్వంలో సాయి పల్లవి ఫీమేల్ లీడ్ రోల్ చేసింది. ఆ సమయంలో ఇచ్చిన ఇంటర్వ్యూ ఇప్పుడు వైరల్ అవుతున్నది. అయితే ఇందులో ఆమె చేసిన వ్యాఖ్యలపై నెటిజన్లు మండిపడుతున్నారు. పాకిస్తాన్ కు మద్దతుగా మాట్లాడి, ఇండియన్ ఆర్మీని కించపరిచారని ఆగ్రహం వ్యక్తం చేస్తున్నారు. పాకిస్తాన్ ప్రజలకు ఇండియన్ ఆర్మీ టెర్రరిస్టులుగా కనిపిస్తారని, కానీ ఇండియన్ ఆర్మీ ఈ దేశ ప్రజల కోసం ఉందని ఇక్కడి ప్రజలు నమ్ముతారని, ప్రాంతాలను బట్టి ప్రజల అభిప్రాయాలు మారుతుంటాయని పేర్కొన్నారు. ఈ వ్యాఖ్యలపై నెటిజన్లు ఆగ్రహం వ్యక్తం చేస్తున్నారు. బాయ్ కాట్ సాయిపల్లవి అంటూ నెట్టింట ట్రోల్ చేస్తున్నారు.

సాయిపల్లవికి ఇదే తొలిసారి కాదు..
అయితే నెట్టింట విమర్శలు ఎదుర్కొవడం సాయిపల్లవికి ఇదే తొలిసారి కాదు. విరాటపర్వం సినిమా విడుదల సమయంలో గోమాంసంపై వ్యాఖ్యలు చేసి ఓ వర్గం ఆగ్రహానికి గురైంది. అప్పుడేదో సర్ది చెప్పుకునే ప్రయత్నం  చేసింది. కానీ అప్పటి వీడియోలోని మరో క్లిప్ పై ఇప్పుడు ఆగ్రహావేశాలు వ్యక్తమవుతున్నాయి.