Kalki
Kalki : ప్రభాస్ సినిమాలు అన్నీ ప్రస్తుతం పాన్ ఇండియా లెవల్లోనే వస్తున్నాయి. బహుబలి తర్వాత ప్రభాస్ నుంచి వచ్చిన సినిమాలు అన్ని దేశవ్యాప్తంగా అలరిస్తున్న విషయం తెలిసిందే. సినిమాల హిట్లు, ప్లాపులతో సంబంధం లేకుండా ప్రభాస్ కెరీర్ సాగుతుండడం విశేషం. ప్రభాస్ నుంచి వచ్చే ప్రతీ సినిమా క్రేజీ ప్రాజెక్టే కావడం గమనార్హం. ప్రభాస్ ఫ్యాన్స్ ఎంతో ఆసక్తిగా ఎదురుచూస్తున్న కల్కి మూవీ మరికొద్ది రోజుల్లోనే థియేటర్లలోకి రానుంది. ఈ మూవీపై అభిమానులతో పాటు సినీ జనాల్లో తీవ్ర ఆసక్తి నెలకొంది.
నాగ్ అశ్విన్ తెరకెక్కిస్తోన్న ప్రభాస్ తాజా చిత్రం ‘కల్కి 2898 ఏడీ’ సైన్స్ ఫిక్షన్ థ్రిల్లర్ గా వస్తున్న విషయం తెలిసిందే. దీని టైటిల్ ను ప్రకటించినప్పటి నుంచి ప్రభాస్ అభిమానులతో పాటు సినీ ప్రియుల్లోనూ ఆసక్తి నెలకొంది. తాజాగా ఓ కార్యక్రమంలో పాల్గొన్న చిత్ర దర్శకుడు నాగ్ అశ్విన్ ఆ టైటిల్ పెట్టడానికి గల కారణాన్ని వివరించారు.
ఈ చిత్రం కథ మహాభారత కాలం నుంచి మొదలై 2898 తో పూర్తవుతుందని ఆయన చెప్పారు. గతంతో ప్రారంభమై భవిష్యత్తుతో ముగుస్తుంది కాబట్టి ఈ టైటిల్ పెట్టామని, దీనిలో మొత్తం 6,000 సంవత్సరాల మధ్య జరిగే కథను చూపించనున్నామని ఆయన తెలిపారు. నాటి రోజులకు తగ్గట్టుగా ఓ ప్రపంచాన్ని సృష్టించామని చెప్పారు. అన్నింట్లో భారతీయత కనిపించేలా జాగ్రత్తలు తీసుకున్నామని తెలిపారు. గతంలో హాలీవుడ్ లో విడుదలైన సైన్స్ ఫిక్షన్ థ్రిల్లర్ ‘బ్లేడ్ రన్నర్’ పోలికలు దీనిలో కనిపించనీయలేదన్నారు. ఇది తమకు సవాల్ అని చెప్పారు.
ఈ అప్ డేట్ తో ఫ్యాన్స్ లో సినిమాపై మరింత అంచనాలు పెరిగాయి. ఈ చిత్రంలో ప్రభాస్ కు జోడిగా దీపికా పడుకునే నటిస్తున్న విషయం తెలిసిందే. ఇంకా ఈ చిత్రంలో అమితాబ్ బచ్చన్, కమల్ హాసన్ కీలక పాత్రల్లో నటిస్తున్నారు. మే 9న ఈ మూవీ వరల్డ్ వైడ్ రిలీజ్ కానుంది. తాజాగా ‘జస్ట్ ది వార్మ్ అప్’ అనే క్యాప్షన్ తో విడుదల చేసిన వీడియో తెగ ఆకట్టుకుంటోంది.