Megastar Chiranjeevi : చిరంజీవిని వెంటాడుతున్న ఆ సెంటిమెంట్.. మరి ‘విశ్వంభర’ దాన్ని బ్రేక్ చేస్తుందా?

Megastar Chiranjeevi

Megastar Chiranjeevi : మెగాస్టార్ చిరంజీవి గురించి మనకు తెలియని విషయాలు ఉండవు. గత నలభై ఏండ్లుగా ఆయన మన ఇంటిలో మనిషిలా మారిపోయారు. నటనతోనూ, సామాజిక సేవతోనూ, ఇప్పుడు ఇండస్ట్రీ పెద్దగానూ నిత్యం వార్తల్లో ఉంటూనే ఉంటారు. చిరు తాజా చిత్రం ‘విశ్వంభర’లో నటిస్తూ బిజీబిజీ అయ్యారు. వాల్తేరు వీరయ్య ఘన విజయం తర్వాత చెల్లెలి సెంటిమెంట్ తో వచ్చిన బోళా శంకర్ ప్లాప్ గా నిలిచింది. అందుకే విశ్వంభరను చాలా కేర్ ఫుల్ గా చేస్తున్నారు.

ఈ చిత్రంలో త్రిష లీడ్ హీరోయిన్ గా నటిస్తోంది. మీనాక్షి చౌదరీ, ఆషికా రంగనాథ్, ఇషా చావ్లా, సురభి తదితర హీరోయిన్లు నటిస్తున్నారు. అలాగే మృణాల్ ఠాకూర్ కూడా ఓ ప్రధాన పాత్రలో నటిస్తున్నట్లు సమాచారం. ఈ మూవీలో చిరు గోదావరి జిల్లాలకు చెందిన వ్యక్తిగా నటించబోతున్నారు. ఈ సినిమా గోదావరి జిల్లాల బ్యాక్ డ్రాప్ తో రూపొందుతున్నది. గ్రామీణ వాతావరణంతో పాటు పౌరాణిక నేపథ్యమూ ఉంది. మల్లిడి వశిష్ట దర్శకత్వం వహిస్తుండగా కీరవాణి మ్యూజిక్ అందిస్తున్నారు.

సోషియో ఫాంటసీ చిత్రంగా వస్తున్న ఈ సినిమాలో చిరు దొరబాబు పాత్రలో నటించబోతున్నారు. త్రిష డబుల్ రోల్ చేస్తున్నట్లు వార్తలు వస్తున్నాయి. అయితే ఈ సినిమాలో చిరు వృద్ధుడి పాత్రలో కనిపించబోతున్నారనే వార్త ఒకటి ఫిల్మ్ నగర్ సర్కిల్స్ లో ప్రచారమవుతోంది. దీంతో చిరు ఫ్యాన్స్ లో కొంత  అలజడి మొదలైందంటున్నారు. ఎందుకంటే గతంలో చిరు వృద్ధుడిగా నటించిన చిత్రాలు పెద్దగా ఆడలేదు. రిక్షావోడు, అందరివాడు, స్నేహం కోసం చిత్రాల్లో వయసు మళ్లిన పాత్రలో చిరు నటించారు. మరి ఈ సెంటిమెంట్ విశ్వంభరలో రిపీట్ అవుతుందో ఏమో అని ఫ్యాన్స్ భయపడిపోతున్నారు. మరి ఈ సెంటిమెంట్ ను విశ్వంభర బ్రేక్ చేస్తుందా? లేదా అనేది సినిమా విడుదల తర్వాతనే తెలియనుంది.