Vijay:గూగుల్ సెర్చ్‌లో ర‌జ‌నీకి షాక్ ఇచ్చిన దళపతి విజయ్!
Thalapathy vijay:2023లో బాలీవుడ్ కొన్ని బ్లాక్ బస్టర్ చిత్రాలతో ఘ‌నంగా పురోగ‌మించింది. అలాగే సౌత్ లో టాలీవుడ్, కోలీవుడ్ లో విజయవంతమైన సినిమాలు బాక్సాఫీస్ హిట్‌ల పెరుగుదలతో క‌ళ‌క‌ళ‌లాడాయి. ఇది దేశీ సినిమాకి శుభ‌సూచిక. అయితే గూగుల్ శోధ‌న‌లో బెస్ట్ హీరో ఎవ‌రు? అన్న‌ది ఇప్పుడు ఆస‌క్తిగా మారింది. తమిళ ప‌రిశ్ర‌మ వ‌ర‌కూ చూస్తే.. 2023లో ఎవ‌రు బెస్ట్? అని ప్ర‌శ్నిస్తే… దళపతి విజయ్ పేరు వినిపిస్తోంది. నిజానికి జైలర్ లాంటి బ్లాక్ బస్టర్ తో సూప‌ర్ స్టార్ రజనీకాంత్ పేరు మార్మోగింది.
ర‌జ‌నీకి గ్రేట్ కంబ్యాక్ ఇచ్చిన సినిమా ఇది. కానీ ఇతర సెలబ్రిటీలను అధిగమించి గూగుల్‌లో అత్యధికంగా సెర్చ్ చేసిన తమిళ హీరోగా దళపతి విజయ్ అగ్రస్థానంలో నిలిచాడు. ఈ ర్యాంకింగ్‌లో సూపర్‌స్టార్ రజనీకాంత్ రెండో స్థానంలో ఉండగా, ధనుష్, సూర్య, అజిత్ కుమార్ తర్వాతి స్థానాల్లో ఉన్నారు. ఈ సంవత్సరంలో దళపతి విజయ్ రెండు విభిన్న సినిమాల్లో నటించాడు. వంశీ పైడిపల్లి దర్శకత్వం వహించిన వరిసు రొటీన్ కథాంశం విష‌యంలో విమర్శలను ఎదుర్కొంది.
అయితే బాక్సాఫీస్ వద్ద ఈ సినిమా చ‌క్క‌ని వ‌సూళ్ల‌ను సాధించింది. లోకేష్ కనగరాజ్ దర్శకత్వం వహించిన లియో విజయ్ కెరీర్ లో మ‌రో బ్లాక్ బస్టర్ గా నిలిచింది. లోకేశ్ సినిమాటిక్ యూనివర్స్ (LCU)లో వచ్చిన లియో నిజానికి మిశ్రమ సమీక్షలను అందుకుంది. కథ – స్క్రీన్ రైటింగ్ విష‌యంలో విమర్శలు ఉన్నప్పటికీ ఈ చిత్రం 2023లో అత్యధిక వసూళ్లు చేసిన ఐదవ భారతీయ చిత్రంగా .. తమిళనాడులో అత్యధిక వసూళ్లు చేసిన చిత్రంగా నిలిచింది.
నెల్సన్ దిలీప్‌కుమార్ దర్శకత్వం వహించిన రజనీకాంత్ జైలర్ కూడా బ్లాక్ బస్టర్ హోదాను సాధించింది. ఇది తమిళ చిత్రసీమలో చెప్పుకోదగ్గ విజయాన్ని సాధించింది. ధనుష్ – అజిత్ కుమార్, వరుసగా వాతి , తునివు వంటి చిత్రాలతో ట్రెండింగులో నిలిచారు. గూగుల్ లో అత్యధికంగా శోధించబడిన టాప్ 5 తార‌ల్లో ఆ ఇద్ద‌రూ స్థానాలను పొందారు. అయితే సూర్య న‌టించిన సినిమా ఏదీ ఈ సంవత్సరంలో విడుదల కానప్పటికీ చిత్రీక‌ర‌ణ‌లో ఉన్న `కంగువ`తో సందడి కొనసాగించారు. గూగుల్ లో టాప్ 10లో వీరంతా నిలవ‌గా దళపతి విజయ్ నంబ‌ర్ 1గా రికార్డుల‌కెక్కాడు.