America : అమెరికాలో తెలంగాణ విద్యార్థి అదృశ్యం

America

America : అమెరికాలో తెలంగాణ రాష్ట్రానికి చెందిన విద్యార్థి అదృశ్యమయ్యాడు. విస్కాన్సిన్ రాష్ట్రంలోని కాంకార్డియా యూనవర్సిటీలో మాస్టర్స్ చదువుతున్న చింతకింది రూపేశ్ చంద్ర కనిపించడం లేదని చికాగోలోని భారత రాయభార కార్యాలయం వెల్లడించింది. ఈ మేరకు గురువారం ‘ఎక్స్’లో పోస్టు చేసింది. ‘మే 2వ తేదీ నుంచి ఇండియా స్టూడెంట్ రూపేశ్ చంద్ర మిస్సింగ్ అవ్వడం పట్ల ఆందోళన చెందుతున్నాం.

రూపేశ్ ఆచూకీ కోసం పోలీసులు, ప్రవాస భారతీయులతో సంప్రదింపులు జరుపుతున్నాం’ అని చికాగోలోని భారత రాయభార కార్యాలయం తెలిపింది. షెరిడాన్ రోడ్డులోని 4300 బ్లాక్ నుంచి రూపేశ్ కనిపించకుండా పోయినట్లు చికాకూ పోలీసులు తెలిపారు. రూపేశ్ ఆచూకీ తెలిస్తే సమాచారం అందించాలని స్థానిక ప్రజలకు విజ్ఞప్తి చేశారు. ఇప్పటికే యూఎస్ లోని భారతీయ విద్యార్థుల భద్రతపై ఆందోళనలు నెలకొన్న వేళ తాజాగా విద్యార్థి కనిపించకుండా పోవడం కలకలం రేపుతోంది.

రూపేశ్ చంద్ర అదృశ్యమైనట్లు తెలియగానే కుటుంబ సభ్యలు ఆందోళనకు గురయ్యారు. తమ కుమారుడి ఆచూకీ కనుగొనాలంటూ భారత విదేశాంత మంత్రిత్వ శాఖను, అమెరికా ఎంబసీని కోరారు. రూపేశ్ చంద్ర హన్మకొండ జిల్లాకు చెందినవాడు. వరంగల్ లోని ఎస్ఆర్ ఇంజనీరింగ్ కళాశాలలో పూర్తిచేసి మాస్టర్ చేయడానికి యూఎస్ వెళ్లాడు.