Flight services : ఇండిగోలో సాంకేతిక లోపం.. దేశవ్యాప్తంగా విమాన సేవలకు అంతరాయం

Indigo Flight services : ఇండిగోలో సాంకేతిక లోపం తలెత్తడంతో సంస్థ కార్యకలాపాలకు అంతరాయం కలిగింది. దీంతో దేశవ్యాప్తంగా సంస్థ కార్యకలాపాలు, విమాన సేవలపైనా ప్రభావం పడింది. ఎయిర్ పోర్టుల్లో చెక్-ఇన్ లు నెమ్మదిగా సాగుతున్నాయి. టికెట్ బుకింగ్ లు సైతం కావడం లేదని ప్రయాణికులు ఎదురుచూస్తున్నారు. తమకు ఎదురైన అసౌకర్యాన్ని సామాజిక మాధ్యమాల్లో ఫొటోలు, వీడియోల రూపంలో షేర్ చేస్తున్నారు. మధ్యాహ్నం 12.30 గంటల నుంచి ఈ సమస్య ఉత్పన్నమైనట్లు తెలుస్తోంది.

సాంకేతిక లోపంపై ఇండిగో ‘ఎక్స్’ వేదికగా స్పందించింది. ప్రయాణికుల అసౌకర్యంపై విచారం వ్యక్తం చేసింది. ‘‘మా నెట్ వర్క్ లు అన్నింటిలోనూ తాత్కాలికంగా వ్యవస్థలు నెమ్మదించాయి. మా వెబ్ సైట్, బుకింగ్ సిస్టమ్ పై ఈ ప్రభావం పడింది. దీని కారణంగా కస్టమర్ల వెయిటింగ్ టైమ్ పెరగొచ్చు. ఎయిర్ పోర్టుల్లో చెక్-ఇన్ లు నెమ్మదిగా సాగుతుండడంతో రద్దీ పెరిగే అవకాశం ఉంది. ప్రయాణికులకు ఏ ఇబ్బంది కలగకుండా సేవలందించేందుకు మా ఎయిర్ పోర్టు బృందం సిద్ధంగా ఉంది. వీలైనంత త్వరగా సమస్యను పరిష్కరించి సేవలను పునరుద్ధరించేందుకు ప్రయత్నిస్తున్నాం. కస్టమర్లకు కలిగిన అసౌకర్యానికి విచారం వ్యక్తం చేస్తున్నాం’’ అని ఇండిగో పేర్కొంది.