Ganja Smugglig
Ganja Smugglig : సులభంగా డబ్బు సంపాదించాలనే ఉద్దేశంతో ఏపీకి చెందిన ఇద్దరు వ్యక్తులు చింతపండు మాటున గంజాయి సప్లై చేస్తున్నారు. హనుమకొండలో గంజాయిని మరో ఇద్దరు వ్యక్తులకు ఇస్తుండగా పోలీసులు పట్టుకున్నారు. నిందితులు ఆంధ్రప్రదేశ్ లోని ఎన్టీఆర్ జిల్లా పొన్నవరానికి చెందిన ఈదర కృష్ణ, అనుముల వెంకటరమణలుగా గుర్తించారు.
సీలేరుకు చెందిన సురేశ్ అనే వ్యక్తి వద్ద నిందితులు గంజాయి కొన్నారు. దీనిని హన్మకొండ జిల్లా శాయంపేటకు చెందిన అబ్దుల్ రహీం, మధ్యప్రదేశ్ కు చెందిన మైనర్ కు ఇచ్చేందుకు చింతపండు, యూరియా బస్తాల మాటున గంజాయిని హన్మకొండకు తీసుకువచ్చారు. బస్టాండ్ లో అనుమానాస్పదంగా తిరుగుతున్న వీరిని గమనించిన స్థానికులు పోలీసులకు సమాచారం అందించారు. దీంతో ఎస్సై శ్రవణ్ కుమార్ సిబ్బందితో వెళ్లి వారిని అదుపులోకి తీసుకొని పోలీస్ స్టేషన్ కు తరలించారు. వారి వద్ద రూ.2.35 లక్షల విలువైన 9.5 కేజీల గంజాయిని సీజ్ చేశారు. సురేశ్ పరారీలో ఉన్నట్లు పోలీసులు తెలిపారు.