Spirit Movie
Spirit Movie : తెలుగు సినిమా ‘ఈశ్వర్’తో సినీ ప్రయాణం మొదలుపెట్టినా ప్రభాస్.. ప్రస్తుతం ‘సలార్’గా పాన్ ఇండియన్ లెవల్లో సత్తా చాటుతున్నాడు. బహుబలి ఘన విజయాల తర్వాత సాహో, రాధేశ్యాం, ఆదిపురుష్ వంటి పరాజయాలు వచ్చినా ఆయన క్రేజ్ రవ్వంతైనా తగ్గలేదు. ప్లాప్ గా నిలచినా.. ఒక్కొక్కటి 200కోట్లకు పైగానే వసూలు చేశాయి. ఇక వాటి తర్వాత వచ్చిన ప్రభాస్, ప్రశాంత్ నీల్ కాంబో మూవీ ‘సలార్’ రికార్డుల మోత మోగిస్తోంది. ఇప్పటికీ రూ.600కోట్ల దాక వసూలు చేసి సత్తా చాటింది.
సలార్ కు ముందు సూపర్ డూపర్ హిట్ గా నిలిచిన ‘యానిమల్’ మూవీ రూ.1000కోట్ల క్లబ్ లో చేరింది. ఈమూవీతో ఎంతోమందికి లైఫ్ వచ్చింది. రణబీర్ కపూర్, రష్మిక, బాబీడియోల్, అనిల్ కపూర్, డైరెక్టర్ వంగా సందీప్ రెడ్డి కెరీర్ కు మరింత మైలేజ్ వచ్చింది. ఇక త్రిప్తి దిమ్రి చేసింది చిన్న పాత్ర అయినా ఇప్పుడామె నేషనల్ క్రష్ అయ్యింది. ఇలా సందీప్ రెడ్డి చేసిన ఈ మూవీతో అతటి స్టామినా ఏంటో దేశానికి అర్థమైపోయింది. సౌత్ నుంచి రాజమౌళి, ప్రశాంత్ నీల్ సరసన చేరిపోయాడు. వాస్తవానికి బాలీవుడ్ ను సందీప్ షేక్ చేస్తున్నాడనే చెప్పాలి.
‘యానిమల్’ గ్రాండ్ సక్సెస్ తో సందీప్ రెడ్డి వంగా జోరు మీదున్నారు. ఇక సలార్ ప్రభంజనంతో ప్రభాస్ దిల్ ఖుష్ గా ఉన్నారు. వీరిద్దరి కాంబినేషన్ లో వస్తున్న ‘స్పిరిట్’ పై ఆ రెండు చిత్రాల కన్నా ఎక్కువ అంచనాలు ఉన్నాయి. ఈ మూవీని టీ-సిరీస్ భూషణ్ కుమార్ నిర్మిస్తున్నారు. ప్రస్తుతం స్క్రిప్ట్ కు సంబంధించిన ప్రైమరీ పనులు పూర్తయినట్టు తాజాగా ఓ ఇంటర్వ్యూ లో సందీప్ రెడ్డి చెప్పారు. వీలైనంత తొందరగా ప్రీప్రొడక్షన్ పనులు ప్రారంభిస్తామని తెలిపారు.
ఈ ఏడాది చివర్లో షూటింగ్ ను మొదలు పెట్టడానికి సన్నాహాలు చేస్తున్నారు. పూర్తి యాక్షన్ ఎంటర్ టైనర్ గా ముస్తాబు కానున్న ఈ చిత్రంలో ప్రభాస్ పవర్ ఫుల్ పోలీస్ రోల్ కనిపించనున్నారు. ఈ సినిమాకు హర్షవర్ధన్ రామేశ్వర్ సంగీత దర్శకుడిగా వ్యవహరించనున్నారు. దీంతో స్పిరిట్ ఆ రెండు చిత్రాలను మించి ఉండాలని ఫ్యాన్స్ ఆకాంక్షిస్తున్నారు.