Stunts
Stunts : సరదా కోసం ఓ బాలుడు కారుతో చేసిన స్టంట్లు ఓ మహిళను బలి తీసుకుంది. ఈ విషాద ఘటన ఉత్తరప్రదేశ్ లోని కాన్పూర్ లో చోటు చేసుకుంది. సోషల్ మీడియాలో లైక్ ల కోసం యువత విపరీత చర్యలకు పాల్పడుతున్నారు. పోలీసులు తెలిపిన ప్రకారం.. 17 ఏళ్ల బాలుడు, తన స్నేహితులతో కలిసి స్కూల్ కు డుమ్మా కొట్టి.. కాన్పూర్ లో రద్దీగా ఉండే రోడ్డుపై కారుతో స్టంట్లు చేశాడు. అదే సమయంలో ఓ మహిళ తన కుమార్తెతో స్కూటీపై వస్తుండగా కారు వేగంగా వచ్చి వారిని ఢీకొట్టింది. దీంతో తల్లీకుమార్తెలిద్దరూ గాల్లోకి ఎగిరి కిందపడ్డారు. స్థానికులు వెంటనే వారిని ఆసుపత్రికి తరలించగా చికిత్స పొందుతూ మహిళ మృతి చెందినట్లు వైద్యులు తెలిపారు. ఆమె కుమార్తె పరిస్థితి విషమంగా ఉంది.
ఈ ప్రమాదానికి సంబంధించిన దృశ్యాలు సీసీ కెమెరాలో రికార్డయ్యాయి. వీటి ఆధారంగా కేసు నమోదు చేసినట్లు పోలీసులు తెలిపారు. ప్రమాదానికి కారణమైన బాలుడిని, అతడి స్నేహితులను అదుపులోకి తీసుకొని దర్యాప్తు చేస్తున్నారు.