– ఎస్ఐ, ఎమ్మెల్యే పీఏపై కేసు నమోదు చేయాలి
Social Media
Social Media : పాలకుర్తి ఎమ్మెల్యే యశస్విని రెడ్డిని ప్రశ్నించినందుకు కులం పేరు పెట్టి దూషిస్తూ యువకుడిని విచక్షణా రహితంగా కొట్టిన తొర్రూరు ఎస్ఐ జగదీష్, ఎమ్మెల్యే పీఏ విజేందర్ రెడ్డిపై ఎస్సీ, ఎస్టీ కేసు నమోదు చేసి కఠినంగా శిక్షించాలని లంబాడి హక్కుల పోరాట సంఘం రాష్ట్ర అధ్యక్షుడు గుగులోతు భీమానాయక్ ప్రభుత్వాన్ని డిమాండ్ చేశారు. గురువారం విలేకరుల సమావేశంలో ఆయన మాట్లాడారు.
తొర్రూరు మండలం వెలకట్టే గ్రామానికి చెందిన మాలోతు సురేశ్ బాబు నాయక్ విద్యార్థి ఉద్యమంలో పనిచేస్తూ, లంబాడీ హక్కుల పోరాట సంఘం జిల్లా అధ్యక్షులుగా పనిచేస్తున్నారని తెలిపారు. రెండు రోజుల క్రితం సోషల్ మీడియాలో సురేశ్ బాబు ఎమ్మెల్యే పీఏను ప్రశ్నిస్తూ ‘‘పాలకుర్తి ఎమ్మెల్యేగా గెలిపించింది మీ పీఏనా.. లేకపోతే పాలకుర్తి ప్రజలా..’’ అంటూ పోస్టు పెట్టాడని తెలిపారు. ఈ విషయంలో ఎమ్మెల్యే పీఏ ప్రోద్బలంతో తొర్రూరు ఎస్ఐ సురేశ్ బాబుు పోలీస్ స్టేషన్ కు రప్పించి ఎమ్మెల్యే పీఏనే ప్రశ్నిస్తావా అంటూ కొట్టినట్లు వివరించారు. ఎస్ఐ పై, ఎమ్మెల్యే పీఏపై ఎస్సీ, ఎస్టీ కేసు నమోదు చేయకపోతే ఎల్ హెచ్ పీ ఎస్ ఆధ్వర్యంలో రాష్ట్ర వ్యాప్తంగా ఉద్యమాలు చేస్తామని హెచ్చరించారు.