NTR Devara
NTR Devara : యంగ్ టైగర్ ఎన్టీఆర్ అభిమానులు జీర్ణించుకోలేని వార్త. దేవర సినిమా ప్రమోషన్స్ మొదలైనప్పటి నుంచి తమ అభిమాన హీరోను నేరుగా చూసుకోలేకపోతున్నారు. స్టేజీ మీద తమ అభిమాన హీరో మాట్లాడుతుంటే చూడాలన్న అభిమానుల కోరిక ఇప్పట్లో తీరేలా కనిపించడం లేదు. `దేవర` ప్రీ రిలీజ్ ఫంక్షన్ వేదికకకు అభిమానులు చేరుకున్నాక ఈవెంట్ రద్దు చేయడంతో ఫ్యాన్స్ కోపంతో ఊగిపోయారు. చివరి నిమిషంలో ఇలా రద్దు చేయడమేంటని మండిపడ్డారు. ఇక సినిమా రిలీజై ఎన్టీఆర్ కెరీర్ లోనే అతిపెద్ద హిట్ గా దేవర నిలవడంతో సెలబ్రేషన్స్ అయినా ఉంటాయని భావించారు. కానీ ఇప్పుడా సెలబ్రేషన్స్ కూడా జరిగే పరిస్థితి కనిపించడం లేదు.
ద‌స‌రా, న‌వ‌రాత్రోత్సవాలు కొనసాగుతున్నందున తెలుగు రాష్ట్రాల్లో స‌క్సెస్ మీట్ పెట్టుకోవ‌డానికి పర్మిషన్ దొర‌క‌డం క‌ష్టంగా ఉందని, అయినా చివరి నిమిషం వ‌ర‌కూ ప్రయ‌త్నిస్తామ‌ని నిర్మాత సూర్య దేవర నాగ‌వంశీ ఎక్స్ వేదికగా ట్వీట్ చేశారు. దీంతో.. దేవర స‌క్సెస్ మీట్ ఏర్పాటు చేయడం కష్టమనే విషయం స్పష్టమవుతున్నది. అక్టోబ‌రు 2న స‌క్సెస్ మీట్ ఉంటుందని, వేదిక కూడా ఫిక్సయ్యిందని రూమర్లు వచ్చాయి. అలా అనుకున్న అక్టోబ‌రు 2వ తదీ వచ్చి, వెళ్లిపోయింది. దీంతో విజయోత్సవాలు ఎక్కడ పెట్టాలనే త‌ర్జన భ‌ర్జన‌లు మ‌ళ్లీ మొద‌ల‌య్యాయి. ద‌స‌రా పండ‌గ లోపే విజయోత్సవం నిర్వహిస్తారని ఎన్టీఆర్ ఫ్యాన్స్ ఆశించారు. కానీ చివ‌రికి నాగ వంశీ చేసిన ట్వీట్ తో అంద‌రి ఆశ‌ల‌పై నీళ్లు చల్లినట్లయ్యింది. ద‌స‌రా పండ‌గ అయిపోయిన త‌ర‌వాత…. స‌క్సెస్ మీట్ పెట్టినా లాభం లేదని, ఎందుకంటే అప్పటికే థియేట‌ర్లలో ప్రేక్షకుల సంఖ్య తగ్గిపోతుంది, అలాగే చిన్న చిన్న సెంటర్ల నుంచి సినిమాను ఎత్తేయక తప్పదు. ఫ్యాన్స్ లోనూ జోష్ త‌గ్గిపోతోంది. ఆరేళ్ల త‌ర‌వాత యంగ్ టైగర్ ఎన్టీఆర్ సోలో హీరోగా తెరకెక్కిన సినిమా దేవర. మొదటి రోజు డివైడ్ టాక్ వచ్చినా ఎన్టీఆర్ గత చిత్రాలను మించి మంచి వ‌సూళ్లు సాధించింది. తనకు సరైన మాస్ సినిమా పడితే బాక్సాఫీస్ పై దండయాత్ర ఎలా ఉంటుందో ఎన్టీఆర్ మరోసారి నిరూపించుకున్నారు. ఇలాంటి సినిమా విజయాన్ని అభిమానులతో కలిసి సెల‌బ్రేట్ చేసుకోవ‌డం చాలా అవ‌స‌రమని ఫ్యాన్స్ అంటున్నారు..
`దేవర` సినిమాకు ప్రమోష‌న్ల ముందు నుంచే పలు ఆటంకాలు ఎదుర‌వుతూ వస్తున్నాయి. తెలుగులో స‌రిగా ప్రమోట్ చేయ‌లేదని ఫ్యాన్స్ ఆగ్రహంగా ఉన్నారు. సినిమా యూనిట్ ఒక్క ప్రెస్ మీట్ కూడా పెట్టలేదు. అయితే డైరెక్టర్ కొరటాల శివ మాత్రం ప్రింట్ మీడియాకు మాత్రం ఇంటర్య్యూలు ఇచ్చారు. కొన్ని ఛాన‌ళ్లకు కూడా శివ ఇంట‌ర్వ్యూలు ఇచ్చారు. ఇక ప్రీ రిలీజ్ ఈవెంట్ చివరి నిమిషంలో ఎలా రద్దయ్యిందో తెలిసిందే. ` దేవర స‌క్సెస్ మీట్ క‌చ్చితంగా అభిమానుల మ‌ధ్యే చేస్తాం` అని డైరెక్టర్ కొరటాల శివ మాట కూడా ఇచ్చారు. కానీ ఇప్పుడా పరిస్థితి కనిపించడం లేదు. దీంతో డైరెక్టర్ కొరటాల శివ మాటనిలబెట్టుకోవాలంటూ ఎన్టీఆర్ ఫ్యాన్స్ డిమాండ్ చేస్తున్నారు.