Shakib
Shakib : బంగ్లాదేశ్‌ కు చెందిన వెటరన్‌ ఆల్‌రౌండర్‌ షకీబ్ అల్‌ హసన్‌ మరోసారి దురుసుగా ప్రవర్తించాడు. పాకిస్తాన్‌తో జరిగిన తొలి టెస్ట్‌ లో షకీబ్.. పాక్ బ్యాటర్‌ మొహమ్మద్‌ రిజ్వాన్ ముఖంపైకి ఉద్దేశ్యపూర్వకంగానే బలంగా బంతి విసిరాడు. దీంతో ఐసీసీ షకీబ్ మ్యాచ్‌ ఫీజులో 10 శాతం కోత విధించింది. ఐసీసీ కోడ్‌ ఆఫ్‌ కాండక్ట్‌ ఉల్లంఘన కింద డీ మెరిట్‌ పాయింట్‌ పొందాడు.
ఆట చివరి రోజు (ఆదివారం-ఆగస్ట్ 25) పాక్ సెకెండ్‌ ఇన్నింగ్స్‌ సందర్భంగా జరిగింది. షకీబ్ బంతి వేసేందుకు సిద్దం కాగా.. రిజ్వాన్ చివరి నిమిషంలో స్ట్రయిక్‌ నుంచి వెనక్కు వెళ్లాడు. దీంతో చిర్రెత్తిన షకీబ్ బంతిని కోపంగా రిజ్వాన్‌వైపు విసిరాడు. గమనించిన ఆన్‌ ఫీల్డ్‌ అంపైర్‌ రిచర్డ్‌ కెటిల్‌బొరో షకీబ్‌ను మందలించాడు. దీంతో విషయం సద్దుమణిగింది. ఐసీసీ రూల్స్ ప్రకారం.. బంతి లేదంటే ఇతర వస్తువులను ఆటగాళ్లపై కానీ, వారి సమీపంలో కానీ విసరడం లెవెల్‌ 1 ఉల్లంఘన కింద పరిగణిస్తారు. ఐసీసీ కోడ్‌ ఆఫ్‌ కాండక్ట్‌ ఆర్టికల్‌ 2.9 కింద పెనాల్టీ విధించారు.
నిర్ణీత సమయంలో వారి కోటాను పూర్తి చేయనందుకు ఐసీసీ ఇరు జట్లకు షాకిచ్చింది. పాక్‌కు 6 వరల్డ్‌ టెస్ట్‌ ఛాంపియన్‌షిప్‌ పాయింట్లు, బంగ్లాదేశ్‌కు 6 పాయింట్లు కోత పెట్టింది. ఈ పాయింట్ల కోత డబ్ల్యూటీసీ పాయింట్ల పట్టికలో ఆయా జట్ల స్థానాలపై ప్రభావం చూపుతాయి. మూడు పాయింట్లు కోల్పోయి బంగ్లా ఏడో స్థానానికి పడిపోగా.. పాక్ ఎనిమిదికి దిగజారింది.
ఇదిలా ఉంటే, రావల్పిండి వేదికగా బంగ్లాదేశ్‌తో జరిగిన టెస్ట్‌ మ్యాచ్‌లో పాక్ 10 వికెట్ల తేడాతో పరాజయం పాలైంది. తొలుత బ్యాటింగ్‌ చేసిన పాక్.. తొలి ఇన్నింగ్స్‌లో ఆరు వికెట్ల నష్టానికి 448 రన్స్ చేసి ఇన్నింగ్స్‌ను డిక్లేర్‌ చేసింది. అనంతరం తొలి ఇన్నింగ్స్‌ ప్రారంభించిన బంగ్లాదేశ్‌ 565 పరుగులు చేసి ఆలౌటైంది.
సెకెండ్‌ ఇన్నింగ్స్‌ మొదలవగానే.. బంగ్లా బౌలర్లు చెలరేగుతూ పాక్ ను 146 పరుగులకే కట్టడి చేశారు. 30 పరుగుల లక్ష్య ఛేదనతో బరిలోకి దిగిన బంగ్లాదేశ్‌.. వికెట్‌ నష్టపోకుండా విజయం సాధించింది. ఈ గెలుపుతో 2 మ్యాచ్‌ల టెస్ట్‌ సిరీస్‌లో బంగ్లాదేశ్‌ 1-0 ఆధిక్యంలోకి వెళ్లింది. రెండో టెస్ట్‌ ఆగస్ట్ 30న జరుగనుంది.
స్కోర్‌ వివరాలు..
పాకిస్తాన్‌ ఫస్ట్ ఇన్నింగ్స్‌ 448/6 (సౌద్‌ షకీల్‌ 141, మొహ్మద్ రిజ్వాన్ 171 నాటౌట్‌, హసన్‌ మొహ్మద్ 2/70)
బంగ్లాదేశ్‌ ఫస్ట్ ఇన్నింగ్స్‌ 565 (ముష్ఫికర్‌ అహ్మద్‌ 191, షడ్మాన్‌ ఇస్లాం 93, నసీం షా 3/93)
పాకిస్తాన్‌ సెకండ్ ఇన్నింగ్స్‌ 146 (మొహ్మద్ రిజ్వాన్ 51, మెహిది హసన్‌ 4/21)
బంగ్లాదేశ్‌ సెకండ్ ఇన్నింగ్స్‌ 30/0 (జకీర్‌ హసన్‌ 15 నాటౌట్‌).