Road accident
Road accident : మహబూబ్ నగర్ జిల్లాలోని భూత్పూర్ మండలం తాటికొండ వద్ద జాతీయ రహదారిపై జరిగిన రోడ్డు ప్రమాదంలో హైదరాబాద్ కు చెందిన నలుగురు మృతి చెందారు. డీసీఎంను కారు డీకొనడంతో ఈ ప్రమాదం జరిగింది. పోలీసులు తెలిపిన ప్రకారం.. హైదరాబాద్ లోని జిల్లెలగూడ ప్రాంతానికి చెందిన ఉరుసుల వెంకట రామారావు (43) ఆస్ట్రేలియా నుంచి ఇటీవలే హైదరాబాద్ కు వచ్చారు. తిరుపతి దైవదర్శనం కోసం మూడు రోజుల క్రితం తల్లి సువర్ణ లక్ష్మి, తండ్రి ఉరుసుల కెంపురావ్ (75), చెల్లెలు ఆవుల అంబిక, బావ ఆవుల అశోక్ యాదవ్ (48), మేనల్లుడు ఆవుల శ్రేయ అగ్రన్య, మేనకోడలు ఆవుల అక్షిత, మరో స్నేహితుడు వెంకటరమణ (43)తో కలిసి కారులో వెళ్లారు.
అనంతరం తిరుగు ప్రయాణంలో తాటికొండ వద్ద నిలిచి ఉన్న డీసీఎంను వెనుక నుంచి కారు ఢీకొంది. ఈ ప్రమాదంలో వెంకటరమణ, కెంపురావ్, అశోక్ యాదవ్ ముగ్గురు అక్కడికక్కడే మృతి చెందారు. తీవ్రంగా గాయపడిన ఐదుగురిని మహబూబ్ నగర్ జిల్లా ఆస్పత్రికి తరలించగా చికిత్స పొందుతూ వెంకట రామారావు మృతి చెందారు. ఈ ప్రమాదంపై కేసు నమోదు చేసి పోలీసులు దర్యాప్తు చేస్తున్నారు.