#RakshasaRaja:రానా ద‌గ్గుబాటి బ‌ర్త్‌డే స‌ర్‌ప్రైజ్‌..`రాక్ష‌స రాజా`

#RakshasaRaja:ద‌గ్గుబాటి ఫ్యామిలీ నుంచి హీరోగా అరంగేట్రం చేశారు ద‌గ్గుబాటి రానా. ఆయ‌న పుట్టిన రోజు నేడు. ప్ర‌తిష్టాత్మ‌క ఏవీఎం సంస్థ నిర్మాణంలో సెన్సిబుల్ డైరెక్ట‌ర్ శేఖ‌ర్ క‌మ్ముల రూపొందించిన `లీడ‌ర్‌` హీరోగా రానాకు మంచి పేరు తెచ్చి పెట్టిన విష‌యం తెలిసిందే. హీరోగా రాణిస్తూనే విభిన్న‌మైన పాత్ర‌ల‌కు రానా శ్రీ‌కారం చుట్టారు. `బాహుబ‌లి` లాంటి భారీ పాన్ ఇండియా సినిమాలో రానా విల‌న్‌గా న‌టించ‌డం తెలిసిందే. ప్ర‌పంచ వ్యాప్తంగా ఈ సినిమా సంచ‌ల‌న విజ‌యాన్ని సాధించ‌డ‌మే కాకుండా టుడిగా రానాకు మంచి పేరు తెచ్చి పెట్టింది.

అయితే రానా హీరోగా మాత్రం ఆశించిన స్థాయిలో రాణించ‌లేక‌పోతున్నారు. విభిన్న‌మైన పాత్ర‌ల్లో న‌టిస్తూనే హీరోగానూ స‌క్సెస్‌లు ద‌క్కించుకోవాల‌ని రానా చేస్తున్న ప్ర‌య‌త్నాలు ఫ‌లించ‌డం లేదు. ఇటీవ‌ల `విరాట ప‌ర్వం`లో న‌టించారు. సాయి ప‌ల్ల‌వి హీరోయిన్‌గా న‌టించిన ఈ సినిమా ఆశించిన ఫ‌లితాన్ని అందించ‌లేకపోయింది. అంత‌కు ముందు ప‌వ‌న్‌తో క‌లిసి చేసిన `భీమ్లానాయ‌క్‌` సో సో అనిపించుకుంది.

దీంతో కొన్ని నెల‌ల పాటు సినిమాల‌కు దూరంగా ఉన్న రానా నెట్ ప్లిక్స్ `రానా నాయుడు`లో అద‌రొట్టిన విష‌యం తెలిసిందే. ఈ విజ‌యంతో రెట్టించిన ఉత్సాహంతో ఉన్న రానా ఈ సారి సోలో హీరోగా బ్లాక్ బ‌స్ట‌ర్‌ని ద‌క్కించుకోవాల‌నే ఆలోచ‌న‌లో ఉన్నారు. ఇందులో భాగంగానే సంచ‌ల‌న ద‌ర్శ‌కుడు తేజ‌తో క‌లిసి మ‌రో ప‌వ‌ర్ ఫుల్ మూవీతో ప్రేక్ష‌కుల ముందుకు రాబోతున్నాడు. ఈ సినిమాకు `రాక్ష‌స‌రాజా` అనే టైటిల్‌ని ఖ‌రారు చేశారు.

గురువారం రానా పుట్టిన రోజు సంద‌ర్బంగా టైటిల్‌తో పాటు మేక‌ర్స్ ఫ‌స్ట్ లుక్ పోస్ట‌ర్‌ని కూడా విడుద‌ల చేసింది. గ‌తంలో వీరిద్ద‌రి కాంబినేష‌న్‌లో `నేనే రాజు నేనే మంత్రి` వంటి హిట్ సినిమా రూపొందిన విష‌యం తెలిసిందే. మ‌ళ్లీ ఇన్నాళ్ల‌కు మ‌రో సినిమా కోసం క‌లిసి ప‌ని చేస్తున్న రానా, తేజ మ‌రోసారి `నేనే రాజు నేనే మంత్రి` త‌ర‌హాలో మ్యాజిక్ చేస్తారా? అనేది తెలియాలంటే మ‌రి కొన్ని రోజులు వేచి చూడాల్సిందే.