PM visit to Russia : పీఎం రష్యా పర్యటన ఖరారు.. బ్రిక్స్ సదస్సులో పాల్గొననున్న మోదీ

PM visit to Russia : రష్యా అధ్యక్షతన నిర్వహించనున్న 16వ బ్రిక్స్ శిఖరాగ్ర సదస్సులో పీఎం మోదీ పాల్గొననున్నారు. ఈ మేరకు పీఎం రష్యా పర్యటన ఖరారైనట్లు  భారత విదేశాంగ శాఖ ప్రకటించింది. మాస్కో అధ్యక్షతన వచ్చే వారంలో జరగనున్న బ్రిక్స్ సదస్సులో మోదీ పాల్గొననున్నారు. రష్యాలోని కజన్ వేదికగా ఈ నెల 22 నుంచి 24 వరకు 16వ బ్రిక్స్ శిఖరాగ్ర సదస్సు జరగనుంది. ఈ సదస్సుకు హాజరు కావాలని రష్యా అధ్యక్షుడు పుతిన్ స్వయంగా మోదీని ఆహ్వానించారు. అందులో భాగంగానే ఈ నెల 22 నుంచి 23 వరకు మోదీ రష్యాలో పర్యటించనున్నారని విదేశాంగ శాఖ తెలిపింది. ఈ సందర్భంగా బ్రిక్స్ సభ్య దేశాల అధినేతలతో మోదీ ద్వైపాక్షిక చర్చలు నిర్వహిస్తారని వెల్లడించింది.