Payal rajput:ఏం చేయాలో చెప్పండి..రిష‌బ్‌శెట్టికి పాయ‌ల్ విన్న‌పం
Payal rajput:సైలెంట్‌గా విడుద‌లై కేవలం మౌత్ టాక్‌తో ఇండియ‌న్ బాక్సాఫీస్ వ‌ద్ద రికార్డులు సృష్టించిన క‌న్న‌డ చిత్రం `కాంతార:ది లెజెండ్‌`. రిష‌బ్ శెట్టి న‌టించి తెర‌కెక్కించారు. `కేజీఆర్‌` సిరీస్ సినిమాల‌తో దేశ వ్యాప్తంగా క్రేజ్‌ని సొంతం చేసుకున్న హోంబ‌లే ఫిలింస్ అధినేత విజ‌య్ కిర‌గందూర్ ఈ మూవీని నిర్మించారు. గ‌త ఏడాది సెప్టెంబ‌ర్ 30న విడుద‌లైన ఈ సినిమా ప్ర‌పంచ వ్యాప్తంగా రికార్డు స్థాయి వ‌సూళ్లని రాబ‌ట్టింది.
భాష‌తో సంబంధం లేకుండా రిష‌బ్‌శెట్టి న‌ట‌న‌ను, `వారాహ రూపం` అంటూ సాగే పాట‌ని ఓన్ చేసుకుని బాక్సాఫీస్ వ‌ద్ద `కాంతార`కు బ్ర‌హ్మ‌ర‌థం ప‌ట్టారు. ప్ర‌స్తుతం ఈ సినిమాకు ప్రీక్వెల్‌గా `కాంతార చాప్ట‌ర్ 1` రూపొందుతోంది. ఈ సినిమాకు సంబంధించిన ఫ‌స్ట్ లుక్ వీడియోని ఇటీవ‌ల మేక‌ర్స్ విడుద‌ల చేయ‌గా అది వైర‌ల్‌గా మారి సినిమాపై అంచ‌నాల్ని పెంచేసింది. ఓ ప‌క్క షూటింగ్ జ‌రుపుతూ ఈ సినిమాలోని కీల‌క పాత్ర‌ల కోసం ఆడిష‌న్స్‌ని నిర్వ‌హిస్తున్నారు.
ఈ నేప‌థ్యంలో Rx 100, మంగ‌ళ‌వారం వంటి సినిమాల‌తో తెలుగులో సంచ‌ల‌నం సృష్టించి న‌టిగా ప్ర‌త్యేక గుర్తింపుని సొంతం చేసుకున్న పాయ‌ల్ రాజ్‌పుత్ ఈ సినిమాపై ఆస‌క్తిక‌ర‌మైన ట్వీట్ చేసింది. ఈ సినిమాలో త‌న‌కు అవ‌కాశం ఇవ్వాలంటూ ద‌ర్శ‌కుడు, హీరో రిష‌బ్‌శెట్టి, చిత్ర నిర్మాణ సంస్థ హోంబ‌లే ఫిలింస్ వారిని రిక్వెస్ట్ చేస్తూ ట్వీట్ చేసింది. తాను న‌టించిన `మంగ‌ళ‌వారం` సినిమాని ఒక‌సారి చూసి త‌న‌కు అవ‌కాశం ఇవ్వాల‌ని కోరింది.
`రిష‌బ్‌శెట్టి, హోంబ‌లే ఫిలింస్ వారి `కాంతార చాప్ట‌ర్ 1` కోసం ఆడిష‌న్స్ జ‌రుగుతున్నాయ‌ని నాకు తెలిసింది. ఈ ప్రాజెక్ట్‌లో భాగం కావాల‌ని నాకు ఆశ‌గా ఉంది. ఇటీవ‌ల విడుద‌లైన నా సినిమా `మంగ‌ళ‌వారం`లో న‌ట‌న‌కు విమ‌ర్శ‌కుల నుంచి ప్ర‌శంస‌లు ల‌భించాయి. మీరు కాస్త స‌మ‌యం వెచ్చించి నేను న‌టించిన సినిమా చూస్తే..మీకు కృత‌జ్ఞ‌త‌లు చెప్పుకుంటాను. ఈ ప్రాజెక్ట్ కోసం ఆడిష‌న్ ఇవ్వ‌డానికి ఏం చేయాలో ద‌య‌చేసి చెప్పండి. నా పేరు రీపోస్ట్ చేస్తూ స‌హ‌క‌రించే అభిమానుల‌కు ధ‌న్య‌వాదాలు` అని పాయ‌ల్ రాజ్‌పుత్ ట్విట్ట‌ర్ వేదిక‌గా పోస్ట్ చ‌సింది. ప్ర‌స్తుతం ఈ పోస్ట్ నెట్టింట వైర‌ల్ అవుతోంది. పాయ‌ల్‌కు మ‌ద్ద‌తుగా నెటిజ‌న్‌లు స్పందిస్తున్నారు.