Akshay Kumar : కొనసాగుతున్న పోలింగ్.. తొలిసారి ఓటేసిన అక్షయ్ కుమార్

Akshay Kumar

Akshay Kumar : సార్వత్రిక ఎన్నికలకు సంబంధించిన ఐదో దశ పోలింగ్ కొనసాగుతోంది. ఈ నేపథ్యంలో సామాన్య ప్రజలతో పాటు బాలీవుడ్ ప్రముఖులు సైతం తమ ఓటుహక్కును వినియోగించుకున్నారు. స్టార్ సెలబ్రిటీలు అక్షయ్ కుమార్ జాన్వీకపూర్, రాజ్ కుమార్ రావ్, ఐరా ఖాన్, ఫర్హాన్ అక్తర్, జోయా అక్తర్, షామిద్ కపూర్ సహా పలువురు తారలు ఓటు వేశారు.

బాలీవుడ్ యాక్షన్ హీరో అక్షయ్ కుమార్ తొలిసారి ఓటు వేశారు. ఇప్పటివరకు కెనడా పౌరసత్వం కలిగిన అక్షయ్, 2023 ఆగస్టులో భారతీయ పౌరసత్వం తిరిగి పొందారు. ఈ నేపథ్యంలో ఆయన తొలిసారి తన ఓటుహక్కు వినియోగించుకున్నారు.

అక్షయ్ కుమార్ కెనడా పౌరసత్వం తీసుకోవడానికి గల కారణాన్ని గతంలో ఓ ఇంటర్వ్యూలో తెలిపారు. ‘‘1990లో నా సినిమాలన్నీ వరుసగా ప్లాప్ అయ్యాయి. అప్పుడు ఏకంగా 15 సినిమాలు పరాజయం పొందాయి. అప్పుడు నేను చాలా నిరుత్సాహపడ్డాను. దీంతో కెరియర్ కాస్త ఇబ్బందుల్లో పడింది.  ఆ సమయంలో కెనడాలో ఉన్న నా స్నేహితుడి సలహా మేరకు అక్కడికి వెళ్లి పనిచేయాలని నిర్ణయించుకున్నా. అప్పుడే కెనడా పాస్ పోర్టు తీసుకున్నాను. న ఇండియా నుంచి వెళ్లిపోదామనుకునే సమయంలో నా రెండు సినిమాలు ఘన విజయం సాధించడంతో నాలో మళ్లీ ఆత్మవిశ్వాసం వచ్చింది. దీంతో అక్కడికి వెళ్లలేదు. ఈ క్రమంలో పాస్ పోర్టు విషయం మరిచిపోయా’’ అని అక్షయ్ తెలిపారు.