Prashant Neel Movie
Prashant Neel : రాయలసీమకు చెందిన ప్రశాంత్ నీల్ కన్నడంలో దర్శకుడిగా సత్తా చాటుతున్నాడు. తొలి సినిమా ఉగ్రం నుంచే మాస్ డైరెక్టర్ గా పేరు తెచ్చుకున్నాడు. కేజీఎఫ్ సిరీస్ తో సౌత్ తో పాటు నార్త్ లోనూ మరో రాజమౌళిలా తన జోరు చూపుతున్నాడు ప్రశాంత్ నీల్. ఇక ప్రభాస్ తో చేసిన సలార్ సౌండ్ బాలీవుడ్ ను షేక్ చేసింది. సలార్-2 కోసం బాలీవుడ్ తో సౌత్ ఇండస్ట్రీ కూడా ఆసక్తిగా ఎదురు చూస్తున్నది. ఈ సినిమా అలా ఉండగానే తాను ఎప్పటి నుంచో ఎదురు చూస్తున్న తారక్ తో సినిమాను పట్టాలెక్కించే పనిలో పడ్డాడు ప్రశాంత్ నీల్. దాదాపు నెల క్రితం పూజా కార్యక్రమాలతో ఎన్టీఆర్ సినిమాను ప్రారంభించాడు.
అటు కేజీఎఫ్-3ని పట్టాలెక్కబోతుందని సాండల్ వుడ్ లో జోరుగా ప్రచారం సాగుతుంది. అదే సమయంలో ఇటు సలార్-2 షూటింగ్ ఇటీవల ప్రారంభించినట్లు హోంబలే ఫిల్మ్స్ ప్రకటించింది. అటు ఎన్టీఆర్ సినిమా స్క్రిప్టు వర్క్ లో పడ్డాడు ప్రశాంత్. ఇవన్నీ జరుగుతుండగానే బఘీర అనే సినిమాకు కథను అందించాడు. ఈ సినిమాలో శ్రీ మురళి హీరోగా నటిస్తున్నాడు. దీపావళి కానుకగా అక్టోబర్ 31న సౌత్ లో విడుదల కానుంది. కానీ ప్రశాంత్ నీల్ కు ఉన్న హిట్లను పరిగణనలోకి తీసుకుంటే ఈ సినిమాకు మంచి బజ్ రావాలి. అదేమీ ఈ సినిమాకు కనిపించడం లేదు. బఘీర సినిమాలో కేజీఎఫ్ చాయలు కనిపిస్తుండడమే ఇందుకు కారణమని తెలుస్తున్నది. ఇప్పటికే ఆన్ లైన్ లో అడ్వాన్స్ బుకింగ్స్ ప్రారంభించగా, టికెట్లు మాత్రం తెగడం లేదు. సినిమా విడుదలయ్యాక మొదటి షోతోనే సూపర్ హిట్ టాక్ బయటకు వస్తే తప్ప ఈ మూవీ నిలబడేలా కనిపించడం లేదు.