Devara-2
Devara-2 : ఎన్టీఆర్‌కు సొలో హీరోగా ఆరేళ్ల విరామం… అంతకు ముందు రెండు సినిమాలు కూడా పేరుకే హిట్టు తప్ప ఎన్టీఆర్ రేంజ్ కలెక్షన్లు అయితే కాదు. ఆ తర్వాత తన తరంలో ప్రధాన పోటీదారైన రామ్ చరణ్‌తో మల్టీస్టారర్. సూపర్ హిట్టు. పాన్ ఇండియా హీరోగా గుర్తింపు. ఇక అక్కడి నుంచి ఎన్టీఆర్ లో అసలైన స్ట్రగుల్ మొదలైంది. తాను ఇచ్చిన మాట ప్రకారం కొరటాల శివతో సినిమా చేయాలి. కానీ ఆచార్య భారీ డిజాస్టర్ తో మరో సంశయం. ఈ టైమ్ లో కొరటాలతో సినిమా చేయాలా వద్దా? కానీ ఎన్టీఆర్ ఇచ్చిన మాటకు కట్టుబడి కొరటాల శివతో సినిమా చేశాడు. అన్నీ కలిసొచ్చాయి. దసరాకు అనుకున్న సినిమాను పదిహేను రోజుల ముందుగానే రిలీజ్ కు సిద్ధమయ్యాడు. పాన్ ఇండియా రేంజ్ లో సినిమా చేస్తున్నా తెలుగులో ప్రమోషన్లు మాత్రం వీక్ గా ఉండడంతో ఎన్టీఆర్ ఫ్యాన్స్ లో అసహనం. అంతలోనే ప్రీ రిలీజ్ ఈవెంట్ క్యాన్సిల్. ఇక అభిమానుల ఆగ్రహం కట్టలు తెంచుకుంది. కానీ సినిమా రిలీజయ్యాక మాత్రం ఫ్యాన్స్ పండుగ చేసుకుంటున్నారు. అదిరిపోయే కలెక్షన్లతో దేవర దుమ్ము రేపుతున్నాడు. ఇక దేవర పార్ట్ 2 ఎప్పుడనే ఆత్రుత ఫ్యాన్స్ లో ఇప్పటి నుంచే మొదలైంది.
సెప్టెంబర్ 27న ప్రపంచ వ్యాప్తంగా విడుదలైన ఎన్టీఆర్ దేవర రూ. 400 కోట్లకు పైగా గ్రాస్ తో బ్రేక్ ఈవెన్ దాటేసింది. 500 కోట్ల టార్గెట్ గా ఎన్టీఆర్ దూసుకుపోతున్నాడు. వీకెండ్ తో పాటు దసరా సెలవులు మరింతగా కలిసి వస్తుండడంతో రూ. 500 కోట్ల మార్క్ అధిగమించడం పెద్ద కష్టమేమీ కాదని ట్రేడ్ పండితులు చెబుతున్నారు. ఎన్టీఆర్ తో మూవీ టీమ్ అంతా సక్సెస్ ను ఎంజాయ్ చేస్తున్నది. కానీ తెలుగు రాష్ర్టాల్లో మాత్రం ఎన్టీఆర్ అభిమానులు కొంత నిరుత్సాహంగా ఉన్నారు. కనీసం సక్సెస్ మీట్ అయినా పెడితే బాగుంటుందని కోరుతున్నారు. ఆ విషయంలో ఎన్టీఆర్ క్లారిటీ ఇవ్వకపోయినా దేవర-2పై మాత్రం ఫ్యాన్స్ కు ఓ అప్ డేట్ ఇచ్చారు.
ఎన్టీఆర్ ఇటీవల అమెరికాలో కూడా ప్రమోషన్స్ చేసిన విషయం తెలిసిందే. అక్కడి మీడియాకు ఇంటర్వ్యూలు ఇచ్చాడు. అదే సమయంలో దేవర పార్ట్ 2 తో పాటు కొరటాల శివ గురించి కూడా పలు ఆసక్తికర విషయాలను వెల్లడించారు. దేవర ఫలితం తాము అనుకున్న దానికంటే బెటర్ గా వచ్చిందని, పార్ట్ 2 మరింత ప్లాన్ చేశామని చెప్పారు ఎన్టీఆర్. ఇప్పటికే కథ కూడా పూర్తి వెర్షన్ సిద్ధమైందన్నారు. పార్ట్ -1 చిత్రీకరణ సమయంలోనే పార్ట్ 2 కి సబంధించిన పలు మేజర్ సీన్స్ కూడా షూట్ చేసినట్లు చెప్పారు. దాదాపు రెండేళ్లకు పైగా సినిమా కోసం కష్టపడ్డామని, అందుకే డైరెక్టర్ కొరటాల శివకు ఓ నెల రోజులు రెస్ట్ ఇస్తున్నట్లు చెప్పారు. ఆ తర్వాత దేవర 2 మీద వర్క్ స్టార్ట్ చేస్తాడని చెప్పుకొచ్చారు. దీంతో ఎన్టీఆర్ ఫ్యాన్స్ ఖుషీ అవుతున్నారు. ప్రస్తుతం ఎన్టీఆర్ హృతిక్ రోషన్ తో కలిసి వార్ 2లో నటిస్తుండగా, ప్రశాంత్ నీల్ సినిమాను ఇటీవలే పూజా కార్యక్రమాలతో మొదలు పెట్టారు.