ntr death anniversary : ‘సమాజమే దేవాలయం… ప్రజలే దేవుళ్ళు’ అన్న సూక్తిని మొదటిసారిగా రాజకీయాలకు పరిచయం చేసిన మానవతావాది… నిరుపేదల జీవితాల్లో సంక్షేమ వెలుగులు నింపిన మహనీయుడు ఎన్టీఆర్. బడుగు బలహీన వర్గాల వారికి రాజ్యాధికారంలో భాగస్వామ్యం కల్పించిన సమతావాది…స్త్రీలకు సాధికారతనిచ్చిన సంస్కర్త…
స్వర్గీయ నందమూరి తారక రామారావు వర్ధంతి సందర్భంగా చేసిన సేవలను గుర్తు చేసుకుందాం..
ఎన్టీఆర్ అంటే ఒక పేరు కాదు.. తెలుగు జాతి ఆత్మగౌరవ పతాకగా అభివర్ణిస్తున్నారు. తెలుగు చిత్రసీమలో చరిత్ర సృష్టించిన గొప్ప నటుడే కాదు, తెలుగు రాష్ట్రాల్లో రాజకీయ నాయకుడిగా కూడా ప్రముఖ పాత్ర పోషించిన వ్యక్తి ఎన్టీఆర్. ఆయన ప్రజలకు చేసిన సేవను, చరిత్రను, సమాజం పట్ల ఆయనకున్న నిబద్ధతను ఎవరూ మరువలేరు. ఆయన 29వ వర్ధంతి సందర్భంగా నందమూరి కుటుంబసభ్యులు, సినీ ప్రేమికులు, ప్రజలు ఎన్టీఆర్ జీవితాన్ని, ఆశయాలను మరోసారి గుర్తు చేసుకుంటారు.
తెలుగుదేశాల ప్రజల గుండెల్లో సుస్థిరమైన స్థానం సంపాదించిన మహానటుడు, రాజకీయ నాయకుడు ఎన్టీఆర్. ఆయన స్వయంసేవ, ప్రజా నాయకత్వం మరియు చిత్ర నిర్మాణంలో అపూర్వ విజయాలు ఆయన మరణం తర్వాత కూడా గుర్తుండిపోతాయి.
ఈ మేరకు ప్రతి సంవత్సరం జనవరి 18న ఆయన వర్ధంతి సందర్భంగా ఆయన అభిమానులు, కుటుంబ సభ్యులు పలువురు ఆయన సమాధి ఎన్టీఆర్ ఘాట్ కు వచ్చి తమ సంతాపాన్ని తెలియజేస్తున్నారు. ఈ సంవత్సరం వర్ధంతి సందర్భంగా ఎన్టీఆర్ , కళ్యాణ్ రామ్, బాలకృష్ణ సహా లోకేష్, అతని కుటుంబ సభ్యులు మరియు ప్రముఖులు నివాళులర్పించడానికి ఘాట్‌కు వచ్చారు.