PM Modi
PM Modi : ప్రధాని మోదీ యూపీలోని వారణాసి లోక్ సభ ఎంపీ స్థానానికి ఈనెల 14న నామినేషన్ దాఖలు చేయనున్నారు. నామినేషన్ వేయడానికి ఒకరోజు ముందు (13న) పెద్ద ఎత్తున రోడ్ షో నిర్వహించనున్నారు. రోడ్ షోకు ముందు మోదీ బనారస్ హిందూ విశ్వవిద్యాలయం ప్రధాన గేటు వద్ద ఉన్న మదన్ మోహన్ మాలవీయ విగ్రహానికి నివాళులర్పిస్తారు.
ఈ రోడ్ షో కాశీ విశ్వనాథ్ కారిడార్ వరకు ఐదు కిలోమీటర్ల మేర కొనసాగుతుంది. లక్షలాది మంది ఈ రోడ్ షోలో పాల్గొనే అవకాశం ఉందని సమాచారం. అస్సి, సోనాపూర, జంగం బరి, గోడౌలియా, బన్స్ పథక్ మీదుగా విశ్వనాథ్ కారిడార్ కు చేరుకుంటుందని బీజేపీ నేత దిలీప్ పటేల్ వెల్లడించారు. ఈ సందర్భంగా ప్రధాని మోదీకి ఘన స్వాగతం పలికేందుకు భారీ ఏర్పాట్లు చేస్తున్నట్లు ఆయన తెలిపారు.
పీఎం మోదీ నామినేషన్ కార్యక్రమ ఏర్పాట్లను హోంశాఖ మంత్రి అమిత్ షా, సీఎం యోగి ఆదిత్యనాథ్ పర్యవేక్షిస్తున్నారు. ఆ పార్టీ సీనియర్ నేత సునీల్ బన్సల్ చాలా రోజుల నుంచి అక్కడే ఉండి పనులను చక్కబెడుతున్నారు.