Secunderabad-Goa : ప్రతి బుధ, శుక్రవారాల్లో సికింద్రాబాద్-గోవాకు కొత్త రైలు

Secunderabad-Goa

Secunderabad-Goa Train : హైదరాబాద్ నుంచి గోవా వెళ్లేవారికి మరో రైలును తీసుకొచ్చింది రైల్వేశాఖ. ఈ రైలు సికింద్రాబాద్ నుంచి గోవాకు వారంలో రెండు రోజుల పాటు నడుస్తుంది. సికింద్రాబాద్ జంక్షన్ నుంచి ఏపీ, కర్ణాటక మీదుగా గోవాలోని వాస్కోడిగామా స్టేషన్ కు ప్రయాణించనున్నట్లు తెలిపింది. సికింద్రాబాద్ నుంచి ప్రతి బుధవారం, శుక్రవారం.. తిరుగు ప్రయాణంలో గురువారం, శనివారం ఈ రైలు ఉంటుంది. రెగ్యులర్ సర్వీసులు ఈ నెల 9న సికింద్రాబాద్ నుంచి, వాస్కోడిగామా 10న ప్రారంభమవుతాయని పేర్కొంది. సికింద్రాబాద్-వాస్కోడిగామా (17039) రైలు ప్రతి బుధ, శుక్రవారాల్లోనూ, వాస్కోడిగామా-సికింద్రాబాద్ (17040) రైలు ప్రతి గురు, శనివారాల్లోనూ బయల్దేరుతాయని తెలిపింది.

ప్రస్తుతం రెగ్యులర్ రైలు సికింద్రాబాద్-వాస్కోడిగామా మధ్య వారంలో నాలుగు రోజులు నడుస్తోంది. రైలు నెం.17063 మంగళ, బుధ, శుక్ర, ఆదివారాల్లో అందుబాటులో ఉంటుంది. డిమాండ్ ఎక్కువగా ఉండటంతో ఈ రైలుకు కిటకిటలాడుతుంది. దీనికి తోడు హైదరాబాద్ నుంచి వాస్కోడిగామాకు మరో రైలు (17021) ఉంది. కానీ అది వారంలో ఒకరోజు మాత్రమే నడుస్తోంది. ఈ రైలులోనూ టికెట్లు దొరకడం చాలా కష్టం. ఈ మార్గంలో డిమాండ్ ఎక్కువగా ఉండడంతో కొత్తగా మరో రైలును ప్రారంభించాలని రైల్వే నిర్ణయించడంతో ప్రయాణికులకు అదనంగా సీట్లు అందుబాటులోకి రానున్నాయి.