Pawan Kalyan
Pawan Kalyan : ఏపీ అసెంబ్లీ ఎన్నికల ఫలితాలు విడుదలైనప్పటి నుంచి దేశమంతా పవన్ కళ్యాణ్ పేరు మార్మోగిపోతోంది. ఆయన పార్టీ పోటీ చేసిన అన్ని స్థానాల్లో గెలిచి విజయదుంధుబి మోగించింది. కూటమి ఏర్పాటుకు తొలి అడుగు వేసిన పవన్..అధికారం సాధించేవరకు ఎంతో కృషి చేశారు. చంద్రబాబు కేబినెట్లో డిప్యూటీ సీఎంగా నియమితులయ్యారు. ఇదిలా ఉంటే తమ్ముడు పవన్ పై నాగబాబు ఇటీవల ఆసక్తికర వ్యాఖ్యలు చేశారు. తమ తమ్ముడు పవన్ను డిప్యూటీ సీఎంగా చూడడం చాలా ఆనందంగా ఉందంటూ జనసేన రాష్ట్ర ప్రధాన కార్యదర్శి కొణిదెల నాగబాబు అన్నారు. అన్ని విషయాల్లో సామర్థ్యం, అన్ని అంశాలపై అవగాహన కలిగిన వ్యక్తి పవన్ కళ్యాణ్ అంటూ చెప్పుకొచ్చారు. పవన్ కి తగిన పదవులు, శాఖలు వచ్చాయని, సమర్థత కలిగిన వ్యక్తికే ఈ పదవి దక్కిందంటూ కీర్తించారు. ఇవన్నీ చూస్తుంటే మంచి రోజులు వస్తున్నట్టు కనపడుతున్నాయని ఆయన కామెంట్ చేశారు.
తాజాగా పవన్ అసెంబ్లీలో అడుగుపెట్టడంపై నాగబాబు సోషల్ మీడియాలో ‘అవినీతిపై గర్జన’ అంటూ ఓ వీడియో షేర్ చేశారు. అది ఇప్పుడు వైరల్ గా మారింది. ఆ వీడియోలో ఓ సింహం గర్జిస్తోంది. ‘‘అసెంబ్లీ గేటు కూడా దాటనివ్వం అన్నారు..?’’ అంటూ అందులో కామెంట్ చేశారు. దీంతో మెగాభిమానులు, జనసైనికులు ఈ వీడియోను ఓ రేంజ్ లో షేర్ చేస్తున్నారు. పవన్ తొలిసారే డిప్యూటీ సీఎం హోదాలో అసెంబ్లీలో అడుగుపెడుతుండడంపై అభిమానుల ఆనందానికి హద్దుల్లేకుండా పోయాయి. పవన్ ను అవమానించిన వారి అడ్రస్ లేకుండా గల్లంతైందని కామెంట్ చేస్తున్నారు. రాష్ట్రంలో అవినీతికి తావు లేకుండా చేస్తామని పవన్ ఎప్పటి నుంచో చెప్పుకుంటూ వస్తున్నారు. ఆయన బాధ్యతలు చేపట్టిన తర్వాత అధికారులతో చేస్తున్న చర్చలు చూస్తుంటే పవన్ ప్రజలకు మార్పు చూపించే విధంగానే ఉన్నట్లు తెలుస్తోంది. కాగా, నేడు పవన్ కళ్యాణ్ అసెంబ్లీలో ఎమ్మెల్యేగా ప్రమాణ స్వీకారం చేశారు. అంతకుముందు సభకు వచ్చిన పవన్ కళ్యాణ్ ను చంద్రబాబు ఆత్మీయ ఆలింగనం చేసుకున్నారు.