Nag Ashwin
Nag Ashwin : కల్కి సినిమాతో జాతీయ స్థాయిలో గుర్తింపు తెచ్చుకున్న ప్రముఖ దర్శకుడు నాగ్ అశ్విన్.. శ్రీమంతుడు సినిమా హీరో మహేష్ బాబును ఆదర్శంగా తీసుకుని తన ఊరి అభివృద్ధికి శ్రీకారం చుట్టారు. నాగర్ కర్నూల్ జిల్లా తాడూరు మండలం ఆయన స్వగ్రామంలోని ఐతోల్ జిల్లా పరిషత్ ఉన్నత పాఠశాలలో నాలుగు అదనపు తరగతి గదులను రూ. 60 లక్షలను విరాళంగా అందజేశారు. వాటి ప్రారంభోత్సవ కార్యక్రమానికి నాగ్ అశ్విన్, ఆయన తల్లిదండ్రులు డాక్టర్ జయంతి, డాక్టర్ జయరాంరెడ్డితోపాటు ఎమ్మెల్యే కూచకుళ్ల రాజేష్ రెడ్డి, జిల్లా కలెక్టర్ బాదావత్ సంతోష్ హాజరయ్యారు.
తన తల్లిదండ్రులు వైద్యులైనా తనను సినీ పరిశ్రమ వైపు నడిపిస్తున్నందుకు నాగ్ అశ్విన్ ప్రత్యేక కృతజ్ఞతలు తెలిపారు. సమాజంలో ఎంత ఎత్తుకు ఎదిగినా నిరాడంబరంగా ఉండాలని తల్లిదండ్రులు నేర్పారని, దీనిని ప్రతి ఒక్కరూ అలవర్చుకుంటే ఉన్నత శిఖరాలను అధిరోహిస్తారని అన్నారు. ఐతోల్ గ్రామంలో ఇప్పటికే అనేక అభివృద్ధి కార్యక్రమాలు చేపట్టామని, భవిష్యత్తులోనూ కుటుంబ సభ్యుల మద్దతుతో ఈ ప్రాంత ప్రజలను ఆదుకుంటామని ప్రకటించారు.