Movie actor Suman as Rajahmundry YCP candidate
Actor Suman : ఆంధ్రప్రదేశ్ రాజకీయాల్లోకి సుమన్ ఎంట్రీ ఇస్తున్నాడని తెలుస్తోంది. ప్రభుత్వంలో ఉన్న వైసీపీ పార్టీ సినీనటుడి సేవలను ఉపయోగించుకోవాలని అనుకుంటుంది. ఈ నేపథ్యంలో ఆయనకు ఇప్పటికే సీటును కన్ఫమ్ చేసినట్లు తెలుస్తోంది. ప్రస్తుతం ఏపీ రాజకీయాల్లో ఈ అంశంపై జోరుగా చర్చ జరుగుతోంది.
టాలీవుడ్‌ ఇండస్ట్రీకి చెందిన సినీ నటుడు సుమన్ కు బంపర్‌ ఆఫర్‌ తగిలిందని చెప్పవచ్చు. రాజమండ్రి వైసీపీ పార్లమెంట్ అభ్యర్థిగా సినీ నటుడు సుమన్ ను బరిలోకి దింపుతున్నట్లు పార్టీ నుంచి సంకేతాలు వస్తున్నాయి. ఇప్పటికే వైసీపీ అగ్రనేతలు ఆయనతో చర్చించినట్లు తెలుస్తోంది. ఇక్కడ పార్లమెంట్ అభ్యర్థిగా గతంలో పోటీ చేసిన మార్గాని భరత్ రానున్న ఎన్నికల్లో ఎమ్మెల్యేగా పోటీ చేయాలని నిర్ణయించుకున్నాడు. ఈ నేపథ్యంలో ఆ స్థానంలో సుమన్ ను దింపాలని పార్టీ యోచిస్తోంది.
గౌడ సామాజికవర్గానికి చెందిన సుమన్ పార్లమెంట్ కు పోటీ చేస్తే బీసీ ఓట్లు గంపగుత్తగా వైసీపీకి పడే ఛాన్స్ ఉంటుందని ఆ పార్టీ భావిస్తోంది. పైగా 25 ఏళ్లుగా ‘స్వర్ణాంధ్ర’ పేరిట సుమన్ సామాజిక సేవా కార్యక్రమాలు చేస్తున్నారు. అటు ఒంగోలు వైసీపీ ఎంపీ అభ్యర్థిగా మంత్రి రోజా బరిలోకి దిగే ఛాన్స్ ఉన్నట్లు తెలుస్తోంది.
ఆమె పేరును రెండు మూడు రోజుల్లో అధికారికంగా ప్రకటించే ఛాన్స్ ఉన్నట్లు సమాచారం. ఈ మేరకు ఆ పార్టీ నేత విజయ సాయిరెడ్డి జిల్లా నేతలకు సమాచారం ఇచ్చినట్లు టాక్. గతంలో ఒంగోలు ఎంపీ స్థానానికి చెవిరెడ్డి భాస్కర్ రెడ్డి పేరును పార్టీ ప్రతిపాదించింది. కానీ మాజీ మంత్రి బాలినేని సహా జిల్లాలోని నాయకులంతా చెవిరెడ్డిని వ్యతిరేకించినట్లు తెలుస్తోంది.