MD Sajjanar : బస్సులోనే మహిళకు ప్రసవం చేసి మానవత్వం చాటుకున్న కండక్టర్ తో పాటు మహిళా ప్రయాణికులకు ఆర్టీసీ ఎండీ సజ్జనార్ అభినందనలు తెలిపారు. సకాలంలో అప్రమత్తమై స్పందించడం వల్ల తల్లీబిడ్డా క్షేమంగా ఉన్నారని వెల్లడించారు. ప్రయాణికులను క్షేమంగా గమ్యస్థానాలకు చేర్చడంతో పాటు సేవా స్ఫూర్తిని ఆర్టీసీ సిబ్బంది చాటుతుండడం ప్రశంసనీయమని సజ్జనార్ పేర్కొన్నారు.
హైదరాబాద్ ముషీరాబాద్ డిపోకి చెందిన 1జడ్ రూట్ బస్సులో జులై 7న ఉదయం శ్వేతా రత్నం అనే గర్భిణీ ఆరాంఘర్ లో ఎక్కారు. బహదూర్ పూర వద్దకు రాగానే ఆమెకు పురిటి నొప్పులు తీవ్రమయ్యాయి. ఈ విషయాన్ని గమనించిన కండక్టర్ ఆర్.సరోజ అప్రమత్తమై మహిళా ప్రయాణికుల సాయంతో సాధారణ ప్రసవం చేశారు. ఆమె పండంటి ఆడబిడ్డకు జన్మనిచ్చారు. అనంతరం సమీపంలోని గవర్నమెంట్ మెటర్నిటీ ఆస్పత్రికి తరలించారు. ప్రస్తుతం తల్లీబిడ్డా క్షేమంగా ఉన్నారు.