Mathu vadalara 2 : చిన్న సినిమా అనుకుంటే కలెక్షన్లలో షాకిస్తున్న మత్తు వదలరా-2..  

Mathu vadalara 2

Mathu vadalara 2 Movie Collections : చాలా రోజుల తర్వాత  తెలుగులో ఓ కామెడీ సినిమా కలెక్షన్ల దుమ్ము దులుపుతున్నది. బాక్సాఫీస్ వద్ద భారీ కలెక్షన్లు  కొల్లగొడుతున్నది. చిన్న సినిమాగా రిలీజై పెద్ద సినిమాలకు ధీటుగా రెవెన్యూ సాధిస్తున్నది. మూడు రోజుల క్రితం విడుదలైన నాన్ స్టాప్ కామెడీ మూవీ ‘మత్తు వదలరా -2’.  చిన్న సినిమాగా విడుదలై కలెక్షన్లలో బాక్సాఫీస్ ను షేక్ చేస్తున్నది. సెప్టెంబర్ 13న ఈ సినిమా విడుదల కాగా, రోజు రోజుకు కలెక్షన్లను పెంచుకొంటూ పోతున్నది. ట్రేడ్ వర్గాల్లో సరికొత్త జోష్ నింపుతున్నది. మత్తు వదలరా మూవీకి సీక్వెల్‌గా రూపొందిన ఈ చిత్రాన్ని రితేష్ రానా డైరెక్ట్ చేశాడు. ఈ  మూవీ బడ్జెట్ ఎంత? బ్రేక్ ఈవెన్ కావాలంటే ఇంకెంత రెవెన్యూ రావాలి?  మూడు రోజుల్లో ఈ సినిమా చేసిన వసూళ్లు ఎంతో తెలుసుకుందాం.

మత్తు వదలరా పార్ట్-1 యావరేజ్ గా నిలిచింది. కానీ సీక్వెల్ మాత్రం ట్రైలర్ నుంచే ఆకట్టుకున్నది.దీంతో పార్ట్-1 ఫలితంతో  సంబంధం లేకుండా సీక్వెల్ మంచి బజ్ వచ్చింది. భారీ అంచనాలతో రిలీజైన మత్తు వదలరా- 2లో శ్రీ సింహా కోడూరి, కమెడియన్ సత్య, సునీల్, అజయ్, ఫరియా అబ్దుల్లా  ప్రధాన పాత్రల్లో నటించారు. మైత్రీ సీఈవో చెర్రి అలియాస్ చిరంజీవి ఈ సినిమాను దాదాపు రూ.16 కోట్ల బడ్జెట్‌తో  నిర్మించారు.  మత్తు వదలరా-2 చిత్రం తొలి రోజు చిన్న సినిమాల్లో రికార్డు కలెక్షన్లు కొల్లగొట్టింది. ఏపీ, నైజాంలో రూ. 2.5 కోట్లు వసూలు చేసింది. ఉత్తర అమెరికాలో దాదాపు 500K డాలర్లు వసూలు చేసింది. ఓవర్సీస్‌లో  2.5 కోట్లు వసూలు చేసింది. తొలి రోజు 5.2 కోట్ల రూపాయలు వసూలు చేసింది.

సత్య కామెడీతో ఈ సినిమాకు హిట్ టాక్ సొంతం చేసుకున్నది. రెండో రోజు కూడా భారీగానే సంపాదించింది. రెండో రోజు(సెప్టెంబర్14న) ఈ మూవీ తెలుగు రాష్ట్రాల్లో రూ. 2.1 కోట్లు, ఇతర ప్రాంతాల్లో రూ. 50 లక్షలు వసూలు చేసింది. దేశ వ్యాప్తంగా రూ. 3.5 కోట్లు వసూలు చేసింది. ఇక  వరల్డ్ వైడ్ గా ఈ సినిమా 5.8 కోట్లు రాబట్టి తొలి రెండు రోజుల్లోనే రూ. 11 కోట్లు సాధించింది.