Manchu Manoj
Manchu Manoj : తన కుటుంబంలో తలెత్తిన వివాదాలు, వైవాహిక జీవితం తదితర కారణాలతో మంచు మనోజ్ చాలా కాలం సిల్వర్ స్ర్కీన్ కు దూరంగా ఉన్నాడు. మంచి ప్రాజెక్ట్ కోసం చాలా రోజులుగా ఎదురు చూస్తు్న్న ఆయనకు ‘మిరాయ్’లో గెస్ట్ రోల్ బాగా నచ్చడంతో ఒకే చెప్పాడు. దీంతో ఆయన మళ్లీ వెండితెరపై కనిపించబోతున్నాడు. అయితే మిరాయ్ లో ఆయన పాత్ర పాజిటివ్ గా ఉంటుందా? లేక నెగెటివ్ గా ఉంటుందా? అనేదానిపై ఇంకా సస్పెన్స్ వీడలేదు.
తేజ సజ్జా, మనోజ్ మంచు, దర్శకుడు కార్తీక్ ఘట్టమనేని తొలిసారి కలిసి నటించిన సూపర్ యోధా చిత్రం ‘మిరాయ్’. రితికా నాయక్ కథానాయికగా పీపుల్ మీడియా ఫ్యాక్టరీ పతాకంపై టీజీ విశ్వప్రసాద్ భారీ కాన్వాస్ పై ఈ చిత్రాన్ని నిర్మిస్తున్నారు.
మనోజ్ రీఎంట్రీ ఇస్తున్న ఈ చిత్రంలో ఆయనను ‘బ్లాక్ స్వోర్డ్’ అనే పాత్రలో చూపించనున్నారు మేకర్స్. మనోజ్ కు పుట్టినరోజు శుభాకాంక్షలు తెలుపుతూ ఆయన పాత్రను పరిచయం చేసే గ్లింప్స్ ను వదిలారు. శక్తివంతమైన ఆయుధంతో ఉన్న మనోజ్ బ్లాక్ స్వోర్డ్ గా మునుపెన్నడూ చూడని ఇంటెన్సివ్ అవతారంలో ఎంట్రీ ఇచ్చాడు.
ఈ పాత్ర కోసం ఆయన మేకోవర్ తో పాటు కఠోర శిక్షణ కూడా తీసుకున్నట్లు తెలుస్తోంది. డిఫరెంట్ ప్రాజెక్ట్ కావడంతో పాటు అతని క్యాస్టింగ్ కూడా ఆ పాత్రకు ఫ్రెష్ నెస్ ను జోడిస్తుంది కాబట్టి మనోజ్ కమ్ బ్యాక్ కు ఈ పాత్ర సరిపోతుంది.
కార్తీక్ ఘట్టమనేని దర్శకత్వం వహిస్తున్న ఈ చిత్రానికి హరి గౌర సంగీతం అందిస్తున్నారు. పీఎంఎఫ్ ప్రొడక్షన్ డిజైన్ అంతా గ్రాండ్ గా ఉంది. వచ్చే ఏడాది ఏప్రిల్ 18న 2డీ, 3డీ వెర్షన్లలో ప్రేక్షకుల ముందుకు రానున్న ఈ సినిమాపై భారీ అంచనాలు నెలకొన్నాయి.