Manchu Manoj- Mounika:మంచు మనోజ్, మౌనిక ఇటీవ‌లే గుడ్ న్యూస్ వినిపించిన విష‌యం తెలిసిందే. త‌న భార్య మౌనిక గ‌ర్భం దాల్చింద‌ని, త్వ‌ర‌లో త‌ల్లికాబోతోంద‌ని ఇటీవ‌ల వివ‌రించారు మంచు మనోజ్. అయితే తాజాగా ఈ జంట క్రిస్మ‌స్ సంద‌ర్భంగా మ‌రో శుభ వార్త చెప్పింది. చాన్నారుల కోసం `న‌మ‌స్తే వరల్డ్` అనే బొమ్మ‌ల షాప్‌ను ప్రారంభించిన‌ట్టుగా తెలిపింది. ఈ విష‌యాన్ని దంప‌తులిద్ద‌రూ ఇన్ స్టా వేదిక‌గా వెల్ల‌డించారు. హైద‌రాబాద్‌లోని ప్ర‌సాద్స్ ఐమాక్స్‌లో `న‌మ‌స్తే వరల్డ్` పేరిట బొమ్మ‌ల షాప్‌ను ప్రారంభించారు.
అయితే ఈ బొమ్మ‌ల‌న్నీ చైనా నుంచి దిగుమ‌తి చేసిన‌వి కాద‌ని, ఇండియాలోనే త‌యారు చేసిన‌వ‌ని మంచు మౌనిక తెలిపారు. పిల్ల‌ల కోసం వ‌చ్చిన ఆలోచ‌న ఇదని, దీనికి పూర్తి స‌హ‌కారం భ‌ర్త మనోజ్ అందించ‌డం వ‌ల్లే ఇది సాధ్య‌మైంద‌న్నారు. భార‌తీయ హ‌స్త‌క‌ళా నైపుణ్యం, మ‌హిళా సాధికార‌త, స్కిల్ డెవ‌ల‌ప్‌మెంట్‌తో న‌మ‌స్తే వరల్డ్ ద్వారా ఉపాధి క‌ల్పించి దేశ ప్ర‌తిభ‌ను ప్ర‌పంచ స్థాయికి తీసుకెళ్తామ‌ని మౌనిక అన్నారు. `మ‌న దేశంలో ఎన్నో గొప్ప క‌థ‌లు ఉన్నాయి. పురాణ క‌థ‌ల‌ను ఆధారం చేసుకుని అందులోని ఒప్ప పాత్ర‌ల చుట్టూ క‌థ‌లు రాశాం.
ఆ క‌థ‌లు రాసే క్ర‌మంలో మొద‌టి లాక్‌డౌన్ వ‌చ్చింది. అప్పుడేం చేయాలో తెలియ‌క బొమ్మ‌లు గీయ‌డం మొద‌లు పెట్టాను. అది ఇలా ఉప‌యోగ‌ప‌డింది. మౌనిక కృషివ‌ల్లే బొమ్మ‌లు త‌యారు చేశాం. దేశం న‌లుమూల‌లా తిరిగి ఒక్కో ప్రాంతం నుంచి ఒక్కో ముడి స‌రుకు తీసుకొచ్చి బొమ్మ‌లు త‌యారు చేశాం. ఇది పూర్తిగా మేడ్ ఇన్ ఇండియా. సినిమాల క్యారెక్ట‌ర్ల‌ని కార్టూన్‌లుగా తీసుకొస్తాం. స‌లార్‌, బాహుబ‌లి, ఆర్ ఆర్ ఆర్, రోబోతో పాటు రేపు రిలీజ్ కానున్న హ‌నుమాన్, ఈగ‌ల్‌..ఇలా ఈ సినిమాల్లోని ప్ర‌తి ఒక్క‌రూ సూప‌ర్ హీరోలే. ఆ క్యారెక్ట‌ర్ల‌ని వీడియో గేమ్స్‌గా, మంచి క్యారెక్ట‌ర్స్‌గా, బొమ్మ‌లుగా తీర్చిదిద్దాల‌ని ప్ర‌య‌త్నిస్తున్నాం ` అని మంచు మనోజ్ తెలిపారు.