Lokesh Kanakaraj : ఓటీటీలోకి వచ్చేసిన లోకేష్ కనకరాజ్ కొత్త చిత్రం..!

Lokesh Kanakaraj New Movie : చేసింది తక్కువ సినిమాలే అయినా, క్రేజ్ మరియు బ్రాండ్ వేల్యూ విషయం లో ఏకంగా రాజమౌళి, శంకర్ రేంజ్ కి చేరుకున్న దర్శకులలో ఒకడు లోకేష్ కనకరాజ్. సౌత్ లో ఉన్న ప్రతీ స్టార్ హీరో లోకేష్ తో ఇప్పుడు కనీసం ఒక్క సినిమా అయినా చేస్తే బాగుంటుంది అని కోరుకుంటున్నారు. ఆ రేంజ్ స్టార్ స్టేటస్ ని కేవలం ఆయన నాలుగు సినిమాలతోనే దక్కించుకున్నాడు.

గత ఏడాది ఆయన తమిళ స్టార్ హీరో విజయ్ తో చేసిన ‘లియో’ చిత్రానికి డివైడ్ టాక్ వచ్చినప్పటికీ కూడా 620 కోట్ల రూపాయలకు పైగా గ్రాస్ వసూళ్లను సాధించింది అంటే లోకేష్ కనకరాజ్ టైం ఏ రేంజ్ లో నడుస్తుందో అర్థం చేసుకోవచ్చు. ప్రస్తుతం ఆయన సూపర్ స్టార్ రజినీకాంత్ తో ఒక సినిమా చెయ్యబోతున్నాడు. ఈ ఏడాది లోనే ఈ సినిమా సెట్స్ మీదకు వెళ్లబోతుంది. ఈ చిత్రం తర్వాత ఆయన లియో 2 , ఖైదీ 2 , విక్రమ్ 2 ప్రాజెక్ట్స్ మీద పని చెయ్యబోతున్నాడు.

కేవలం దర్శకుడిగా మాత్రమే కాదు, నిర్మాతగా కూడా లోకేష్ కనకరాజ్ తన సత్తా చాటాడు. ఆయన నిర్మాతగా మారి నిర్మించిన మొదటి చిత్రం ‘ఫైట్ క్లబ్’. సస్పెన్స్ యాక్షన్ థ్రిల్లర్ గా తెరకెక్కిన ఈ సినిమాలో విజయ్ కుమార్ అనే తమిళ హీరో నటించాడు. గత ఏడాది డిసెంబర్ 15 వ తారీఖున థియేటర్స్ లో విడుదలైన ఈ చిత్రం కమర్షియల్ గా సూపర్ హిట్ స్టేటస్ ని దక్కించుకుంది. కేవలం 5 కోట్ల రూపాయిల బడ్జెట్ తో తెరకెక్కిన ఈ సినిమా కేవలం తమిళనాడు రాష్ట్రం నుండి పాతిక కోట్ల రూపాయిల గ్రాస్ వసూళ్లను దక్కించుకుంది. షేర్ లెక్కలోకి వస్తే దాదాపుగా 16 కోట్ల రూపాయిలు ఉంటుంది అన్నమాట. అంటే పెట్టిన బడ్జెట్ కి మూడింతలు లాభాలు వచ్చాయి.

ముఖ్యంగా ఈ సినిమాలోని యాక్షన్ సన్నివేశాలు ప్రేక్షకులను విశేషంగా ఆకట్టుకున్నాయి. థియేటర్స్ లో అమితంగా ఆకట్టుకున్న ఈ చిత్రం ఇప్పుడు డిస్నీ + హాట్ స్టార్ లో అందుబాటులోకి వచ్చేసింది.థియేటర్స్ లో అమితంగా ఆకట్టుకున్న ఈ చిత్రం ఓటీటీ ఆడియన్స్ ని ఎంత వరకు మెప్పిస్తుందో చూడాలి. తమిళ భాషతో పాటుగా తెలుగు , హిందీ మరియు కన్నడ భాషల్లో కూడా ఈ సినిమా డిస్నీ + హాట్ స్టార్ లో అందుబాటులో ఉంది.